Shillong, Jymmang 14:
U kyrtong ka National People’s Party (NPP) na Sohïong konstitwensi, Bah Samlin Malngiang u la ong ba un kyrpad ïa ka sorkar ba kam dei ban ai eiei ïa ka Sohïong namar kim don ka jingsngewnguh ïa ka jingleh bha.
Ïa kine ki kyntien u la pynpaw haba ai jingkren ha khmat ki nongkyrshan ka NPP ha phyllaw ïing sah jong u ha Shillong hadien ba u la shah rem ha u kyrtong ka UDP Bah Synshar Lyngdoh kaba la long ha ka 13 tarik mynta u bnai.
Katkum ka ‘video’ kaba la saphriang ha rynsan lad pathai, u Bah Samlin u la ong, kin nym lah ban pynkynriah kam khlem da ïoh hukum na u ruh.
“Katne ki pynsat, ngan sa peit haduh katno ki lah ban trei hangtei bad ngan ïuh bad kti bad kjat ban khang lyngba ka sorkar ba ym dei ban ai eiei ïa ka Sohïong namar kim sngewnguh ïa ka jingleh bha” u la ong.
Hadien ba u la dep kren ki paidbah nongkyrshan ki la thap kti ban ai ka jingkyrshan ïa ka jingkren jong utei u kyrtong ka NPP na Sohïong.
Ha kane ka ilekshon na Sohïong konstitwensi, u Bah Samlin Malngiang u la ïoh 13,257 vote bad u la shah rem da 3,422 ‘vote’ ha u kyrtong ka UDP, Bah Synshar Lyngdoh uba la ïoh 16,679 ‘vote’.
Kum ban shu pynkynmaw, u Bah Samlin u la jop ïa ka ilekshon MLA ha u snem 2018 na ka seng HSPDP bad long ruh kum u Myntri ha ka MDA-1 haduh ar snem shiteng. Shwa saw sngi jong ka jingthep ‘vote’ ha Sohïong konstitwensi u la pynïasoh pura noh sha ka NPP.
Katba u Bah HDR Lyngdoh (bam kwai ha dwar u blei) uba la shah rem noh ha ka ilekshon 2018 haba u ïakhun na ka Congress u la rung noh sha ka UDP ban ïakhun ïa ka ilekshon 2023. Hynrei, ha ka 20 tarik Rymphang, 2023 u la khlad kyndit kynsan bad la pynsahteng shwa ïa ka ilekshon ha katei ka konstitwensi.
Hadien ba khlad u Bah HDR Lyngdoh, na ka liang ka ïing ka sem ka la rai ban sei da u Bah Synshar Lyngdoh uba dei u pyrsa trai jong utei rangbah ba un long kum u kyrtong ka UDP.
