Tura, Jymmang 14:
U District Transport Officer (DTO) ka East Garo Hills, u Gene Kelly G. Momin u la shah kem noh ha ki pulit ka Assam hadien ka jingkynnoh ba la lap ïa ki jingbym biang haba ïadei bad ka jingai nombor (kali) sha ki kali kiba shah tuh ne ki bym siew khajna.
Kaba lyngngoh ka long ba mar syn ïoh jingtip halor ka jingshah kem jong uwei na kiba donkti ha katei ka kam, ka la don ka jingpluh ding kaba la ujor ha ophis u DTO, East Garo Hills, da ka jingpyrshang ban pynjulor ïa katto-katne ki kot ki sla donkam.
Wat la ka jingkheiñ halor ka jingdon jong kiba kum kitei ki kali kiba la pyllait ne ba la ai ïa ki kot ki sla ba thok kam pat long kaba shai, ki tyllong khubor ki ïathuh ba ka jingdon jong kiba kum kitei ki kali ka lah ban poi da ki spah tylli.
Katkum ki jingtip kiba tikna na ki pulitAssam, la pynïeng ïa ka ‘Naka’ hakhmat thanat Agia ha ka 5 tarik mynta u bnai bad la bat ïa kawei ka kali ‘Suzuki Dezire’ ban talasi ïa ka.
Ha katei ka jingtalasi jong ki pulit, la kurup noh ïa 5 tylli ki syrnot ba ïadei bad ki nombor (kali) bapher-bapher na u trai kali ba la tip kyrteng kum u Golam Ali @Soto, nongshong shnong ka Kismatpur, Goalpara. Katkum ki jinglap, la shem ba baroh 6 tylli kitei ki syrnot la pynbiang da u DTO, u Gene Kelly.
Kaei kaba la pynkylla ïa katei ka jinglap ka long ba na kitei ki 6 tylli ki syrnot, la lap ba 5 tylli na ki, la shna ha ryngkat ki nombor ‘engine’ bad ‘chassis’ ba thok.
Ha ka jingshisha, wat ka kali jong u Golam Ali kaba la shah bat ha ki pulit (ML-07-C-1786), ka nombor ‘engine’ jong ka kali ka la pyni da uwei u trai bad wat u nombor ‘chassis’ ruh, um treikam shuh ha ka ‘database’ jong ka ‘Maruti Suzuki’.
Hadien kane, ki pulit ki la tohkit ïa baroh ki syrnot ba ïadei bad ki nombor kali ba la lap na kali u Ali bad la shem ba 4 na ki 5 tylli ki nombor (kali) ki la wan ha ryngkat bad ki nombor ‘engine’ bad ‘chassis’ ba thok (katkum ka kompeni – Suzuki bad Tata, ‘database’).
Ha kajuh ka por, la pynlong ka jingtohkit bniah halor kane bad la lap ba u DTO ka EGH u la pynbiang ïa ki syrnot nombor kali khlem da peit bniah ïa kino-kino ki jingtip ba biang jong u nombor ‘engine’ ne ‘chassis’ jong kitei ki kali.
Nalor kane, katkum ki tyllong khubor ki pulit, mar-mar hadien ba la ujor mukotduma halor katei ka jingjia bad ka jingshah kem u Golam Ali ha ki pulit Assam ha Agia (ha ka 5 tarik mynta u bnai), la ïoh jingtip halor ka jingsuba pluh ding ha ophis u DTO, haba ïadei bad katei ka jingjia. Ki kot ki sla ba donkam jong katei ka jingjia la ong ba ki la ing lut.
Katkum ka jingong ki pulit Assam, ki sabut ba biang bad ki jingtip ba bniah halor ka jingïakylliang pisa hapdeng u Ali bad Momin ka la ïalam sha ka jingshah kem jong u DTO ha ka 13 tarik mynta u bnai.
Shuh shuh, katkum ki jinglap ba sdang, u Ali lem bad ki briew jong u ki ju leit mih sha u DTO ban pynïoh nombor kali na bynta ki kali kiba shah tuh, bym siew khajna ne kiba suba shah lilam thok kum ki kali thymmai.
Kiba bun ki kali rim ki la ïoh ïa ki nombor kali thymmai; kaba kdew shai ïa ki jingpynkheiñ kyndon. Kiba bun na ki kali kiba la ïoh nombor be-aiñ ki dei kiba na Assam.
Hadien katei, ki trai kali ki la buhrieh noh ïa ki kali kiba la suba ïoh nombor be-aiñ namar kitei ki daw.
