Jowai, Jymmang 14:
Ka Lion Sports & Youth Affairs ka la long ka lahduh ha ka lympung ïalehkai Cricket kaba la tip kum ka “Open to All Cricket Tournament 2023” ba la pynïaid da ka West Jaiñtia Hills District Cricket Association Jowai.
Kane ka la wan urlong hadien ba ka Lion Sports & Youth Affairs ka la pynliem noh ïa ka Efty United XI Mynsoo da kaba pynhap 3 wiket ha ka jingïakhun final kaba la long ha madan Khlieh-tyrshi Mini Stadium ha ka sngi Saitjaiñ.
Ïa kane ka lympung ïalehkai kriket la pynhap pyrda da u Sidharth Benerjee, President ka Jaiñtia Cement Manufac-turers Association ha ka jingdonlang u Waheh Shnong Khliehtyrshi u Bah Kithok Rymbai ha ka jingïalang ba la pynïaid da u Vice President WJHDCA u Bah Isaïa Muksor.
Haba phai sha ka jingïakhun final, ïa ka jingkynting pisa la jop da ka EftyUnited bad ka la kam trai shwa ban tied nyngkong ha kaba ka la kamai haduh 177 run na ki 33.2 over bad hap lut baroh ki wiket.
U Sylvester Mylliem-pdah u la tied 79 run na ki 78 bol bad u Sanvert Kurkalang u la tied 28 run na ki 22 bol. Katba u Deibormi Rangad ka Lion Sports & Youth Affairs u la pynhap 4 wiket na ki 7 over, u Peterson Lamare u la pynhap 2 wiket na ki 5.2 over bad u Firstborn-son Dkhar u la pynhap 2 wiket na ki 3 over.
Haba beh ïa ka thong, ka Lion Sports & Youth Affairs hapoh ka 28.4 over ka la kamai 181 run bad hap 7 wiket. U Nik Dan u la tied 58 run na ki 63 bol, u Peterson Lamare u la tied 35 run na ki 26 bol bad u Firstbornson Dkhar u la tied 30 run na ki 25 bol. Katba na ka liang ka Efty United XI Mynso, dei tang u Sylvester Mylliempdah uba la khur haduh 4 wiket na ki 7 over.
La sam ïa ka khusnam ‘Man of the Match’ sha u Deibormi Rangad jong ka Lion Sports & Youth Affairs. Ka nam ‘Highest wicket taker’ la ïoh da u Deibormi Rangad jong ka Lion Sports Youth Affairs, ka nam ‘Highest Runs Scorer’ la ïoh da u Sylvester Mylliempdah ka Efty United XI Mynso, bad ïa ka nam ‘Man of the Tournament’ ruh la ïoh da u Sylvester Mylliempdah.
