Shillong, Jymmang 15:
Ka Voice of the People Party (VPP) ka la pynbna ban pynlong da ka jingïashong kyllaiñ mungor (sit-in-demonstration) ha ka 17 tarik Jymmang kum ka dak ban pynpaw ïa ka jingpyrshah halor ka jingsngap mynthi ka Sorkar MDA-2 ba la lamkhmat da ka NPP ïa ka jingdawa ban pynsangeh shuwa ïa baroh ki jingthung kam tat haduh da dep bishar thymmai ïa ka Reservation Policy.
Ïa kane ka rai ban pynlong da ka jingïakhih ba jai jai, la pynbna ha ka Lah Sngi U Blei da ka VPP hadien ba ka jingai por kaba 48 kynta ïa ka sorkar ka la kut noh ha ka janmiet jong ka Sngi U Blei.
Ha ka kyrwoh khubor ba la pyllait da u Nongaiktien ka VPP, u Dr Batskhem Myrboh, u la ong ba ka VPP ka la shim ïa kane ka rai ka dei namar ka jinglong mynthi bad jingsngap jar jar jong ka Sorkar MDA-2 ïa ka jingdawa ka VPP ban pynsangeh shuwa ïa baroh ki jingthung kam ha Jylla tat haduh ban da dep bishar thymmai ïa ka State Reservation Policy bad Roster System da ki Committee na ki riewshemphang.
U Dr Batskhem u la pyntip ba ïa kane ka jingïashong kyllaiñ mungor yn pynlong ha ka 17 tarik mynta u bnai, ha jaka pynïeng kali kaba don marjan bad ka Additional Secretariat naduh ka por 10 baje mynstep haduh 4 baje janmiet.
Une u nongaiktien ka VPP u la ong ba ka seng ka kyntu ïa ki nongtrei bad nongkitkam ka seng kumjuh ruh ïa ki paidbah ba kin wan ïashim bynta ha kane ka jingïakhih ban pynbor ïa ka Sorkar Jylla halor ki mat jingdawa ba ka la buh.
“Ngi dei ban kynmaw ba kane ka sorkar kaba lamkhmat da ka NPP ka ïaleh ban leh kyllut ïa ka rukom pyrkhat ba shong nia, ïa ka hok ka sot bad ka ka jingeh jong ki paidbah,” la ong u Dr Batskhem bad pyntip ruh ba ïa kiwei pat ki prokram ïakhih yn pynbna pat kham hadien.
Lah ban pynkynmaw ba ha ka 12 tarik Jymmang, ka VPP ka la aiti ïa ka shithi sha u Myntri Rangbah ka Jylla, u Conrad K Sangma lyngba u Symbud Myntri Rangbah hadien ka jingïalang paidbah ba la pynlong ha ka jaka ïeng kali kaba don marjan bad ka Additional Secretariat.
