Shillong, Jymmang 15:
U President barim ka Federation of Khasi Jaiñtia & Garo People (FKJGP) u Bah Wellbirth Rani ha ka Sngi Thohdieng jong ka taïew ba la dep, u la hiar ai mynsiem bad kitbok kitwriang ïa ka kynhun ïalehkai ka Tyrsad Umkseh Sports Club ka ban ïashim bynta ha ka sien ba nyngkong eh ha ka Meghalaya State League, 2023.
Ka Tyrsad Umkseh Sports Club ka la ïoh rung sha ka Meghalaya State League (MSL) hadien ba khur ïa ka nam kum ka lahduh ha ka lympung ïalehkai ba la pynïaid da ka Tyrsad Area Sports Association.
Ka Tyrsad Umkseh Sports Club ka la don ha ka thup Group-A jong ka Shillong Zone kaba kynthup ïa ka lahduh jong ka Shillong Premier League (SPL 2022) ka Mawlai Sports Club, kumjuh ka Langsning FC. Kiwei pat ki kynhun kiba don ha kane ka thup ïalehkai ki dei ka Jyntru Sports Club, ka Umrit Sports Club bad ka Seng Samla Laitryngew.
Ka Tyrsad Umkseh SC kan sdang ïa ka jingïakhun kaba nyngkong ha ka Sngi Ba-ar pyrshah ïa ka Langsning Sports Club bad kan ïakhun khatduh ïa ka Umrit SC ha ka 1 tarik u Jylliew.
Haba ïoh jingtip ïa kane ka jingïoh rung ka klob sha ka Meghalaya State League, u Bah Wellbirth kum u nongshong shnong ka thaiñ, u la leit ban ïakynduh ïa ki ‘rangïalehkai ka kynhun ha ka step sngi Thohdieng katba ki dang ïa kilanmet ha madan jong ka shnong.
Ha kane ka jingïakynduh, u Bah Wellbirth u la ai mynsiem ïa ki ‘rangïalehkai ha ryngkat ka kitbok kitrwiang ruh ba kin lah ban ïalehkai bha bad ban poi sha ka thong kum ki nongjop.
Ha kane ka sngi u Bah Wellbirth u la ïarap ruh da ka song pisa sha kane ka kynhun ïalehkai ba kynthup ïa ki tracksuit sha ki ‘rangïalehkai bad ka song pisa ba T.1 lak ba ka kynhun kan ïoh pyndonkam na ka bynta ki jingdonkam ki ‘rangïalehkai. U la ong ba kane ka jingai jingïarap ka dei tang ka jingai mynsiem ban lah kyntiew ïa ki kam ïalehkai hapoh ka dong ka thaiñ.
