Itanagar, Jymmang:
Ki bor pulit jong ka jylla Arunachal Pradesh Police ha ka 14 tarik mynta u bnai ki la pyntip ba ki la ïoh ban kem ïa ki 10 ngut ki briew kiba donkti ban pynthut ïa ka shong suk shong saiñ bad kumjuh ruh na ka jingdonkti ban pynjulor ïa ki jingdon jingem ha ki jaka paidbah ha ki kynta ba la pynjari ïa ka jingpakhang shnong kaba la kut noh ha ka step jong ka Sngi U Blei ba la dep.
Kat kum ka jingpyntip jong ki bor pulit, ki la ïathuh ba na ka liang ka tnat pulit ka la ïoh ban pynrung ïa 12 tylli ki mokotduma bad ïoh ruh ïa ki jingtip kiba bniah shaphang ki 40 ngut ki runar kiba la donkti ban wanrah ïa ki jingkulmar bad donkti ha ki kam pynjulor ïa ki jingdon jingem ha ki kynta ba la pynjari ïa ka pakhang shnong kaba la neh 72 kynta.
Na ka liang ka tnat pulit ka la pyntip ba ki la don haduh 41 ngut ki runar kiba la shah kem bad shah pynngat hapoh ki kyndon jong ka Arunachal Pradesh Unlawful Activities (Prevention) Act (APUAPA), 2014 na ka daw jong ka jingdonkti jong ki ban pynjulor ïa ki jingdon jingem ha ki jaka paidbah.
Na ka liang u APP PRO Rohit Rajbir Singh u la pyntip ba ha ki 3 sngi ba la pynjari ïa ka jingpakhang shnong, ki pulit ka jylla ki la ïoh ban kem ïa 120 ngut ki briew kiba la donkti ban thaw jingkulmar, hynrei la pyllait noh ïa ki tang hadien katto katne kynta.
Na ka liang u heh pulit u la pyntip ba ki bor pulit jong ka jylla mynta ki dang pynlong ïa ki jingtohkit ban ïoh kem ïa kito ki runar kiba la donkti ban lum pisa beaiñ na ka bynta ban pynïaid ïa ka jingpakhang shnong. U la pyntip shuh shuh ba ka tnat pulit jong ka jylla ka la ïoh ïa ki jingtip kiba bniah halor ka jingdon jong ki runar kiba la donkti ban lum pisa na ka bynta ban pynïaid ïa ka pakhang shnong ha kylleng ki bynta jong ka jylla. U heh pulit u la ïathuh ba na ka liang ka tnat pulit ka la lum ïa ki jingtip kiba bniah lyngba ki ‘bank detail’ bad ki kam phah pisa (transactions).
Kum ban shuh ïathuh hangne la ong ba na ka liang ka Nari Shakti bad ka Pro Dam ki la khot ban pynlong da ka jingpakhang shnong kaba 72 kynta ba baroh ki bynta jong ka jylla Arunachal Pradesh naduh ka 10 tarik tad haduh ka 12 tarik mynta u bnai. Na ka liang kitei ki kynhun ki la khot ban pynlong da ka jingpakhang shnong ban dawa na ka sorkar jylla ban pynurlong ïa ki 13 ki mat jingdawa kiba ïadei bad ka jingjia lait tuh jong ki jingkylli eksam kam Arunachal Pradesh Public Service Commission (APPSC).
