Kyiv, Jymmang:
U President ka Ukraine ha ka Sngi U Blei u la ong ba ka Ukraine bad ki ri Sepngi baroh kawei, ki lah ban pynkylla khongpong ia ka jingthmu jong ka Russia bad ban pynshah rem ia ka lada ki ai jingkyrshan radbah ia ka Ukraine ha une u snem. Ia kane, u Zelensky u la kren ha ka por ba u ai jingkren khublei ia ka Germany halor ka jingphah ia ki tiar thma bad ki lad jingiarap sha ka tnat shipai ha ki khyndiat sngi ba la leit.
Utei u nongialam ka Ukraine u la ong ruh ba ka Ukraine kam lah shuh ban pynpaw haduh katto ka jingsngewnguh ba kam lah shuh ban siew kylliang ia ka jingiarap jong ka Germany hapdeng ka jingiakhun jong ka pyrshah ia ka Russia ha katei ka thma kaba la neh slem bha la shi snem tam mynta.
Namarkata, u la ong ba kane ka long ka por ia baroh ki ri sepngi, ba kin iatylli lang kawei ban ai jingsneng ia ka Russia bad ban iakhun lang na ka bynta ban pynrem ia ka Russia ha kane ka thma bad hapoh jong une hi u snem.
La ong ruh ba la khmih lynti ba ka Ukraine kan sa pynphai kylliang bad kan pynjur ia ka jingiakhun ha kine ki khyndiat por ban wan, naka bynta ban ioh knieh biang noh ia kito ki bynta jongka, kiba ka la shah knieh bad shah kam trai ha ka Russia.
Shuh shuh ruh u la ong ba watla kiwei ki ri ki la pyrshang ban wanrah jing-iasuk hapdeng ka Russia bad Ukraine, hynrei kata kan shong ha ka Ukraine bad ka rai jongka namar ka thma ka jia hapoh ka ri Ukraine bad kumta ruh ka rai ïasuk ka shong ha ka Ukraine.
Namar na ka liang ka Ukraine, ka la pynpaw ia ka jingsngew bitar halor ka jingleit knieh bad jingkam trai jong ka Russia ia ki bynta kiba dei hok ki jong ka Ukraine bad namarkata, ka la ong ba ka Ukraine kan ym treh ïasuk katba kam pat ioh biang ia baroh ki bynta kiba la kurup da ka Russia naduh ba sdang ka thma.
