Mairang, Jymmang 15:
U MLA ka North Shillong, Bah Adelbert Nongrum, u la ong ba ka jingïaleh ha ki por kiba mynta kam dei shuh bad ki nongwei, hynrei ka la dei bad ki paradoh parasnam bad lyngba ka jingmih u prah uba lah ban pynïakhlad hapdeng u kba u khaw bad u stait ban jied ban peh ban tai bad ban pynher ïa u stait sha jngai khnang ba ka jaidbynriew kan im laitluid.
U Bah Adelbert u la pynpaw ïa katei haba kren ha ka jingïalang pynrung dkhot jong ka VPP ha Kynshi Mawsarong ha Eastern West Khasi Hills ha ka Lah Sngi U Blei.
Nangta u la ong, “Ban long nongïalam kam mut ban khur lut ban knieh lane klun lut na ki paidbah, hynrei ban long u nongïalam ka mut ban aiti lut ban len lade khnang ban lah ban tei bad ban pynskhem ïa ka jaidbynriew.”
Nalor kata, u la ong ruh ba “Ka rta kaba ngi don kam pher, hynrei nga pyntikna ba ka jingïap ka jong ngi kan dei ha ka jingïaleh na ka bynta ban im ka pateng ka lawei bad ki longdien ki ban dang kha sha kane ka sla pyrthei.”
Shuh shuh u la ong ruh ba ka jylla ka la kynjoh 51 tylli ki snem, hynrei ym lah ban tip ka don shalor ne sha tbian, dei na kata ka daw donkam ban sngewthuh ban puson bad ban pyrkhat ïa kaei kaba ka jaidbynriew ka donkam. U la ong ruh mynta ka la kut ki lad ki lynti bad ka jingpheil jong kiwei ki seng riewlum ka long ka daw bah ba sa kha ïa ka VPP ha kaba kiwei kim lah ban pyndep ïa ki kular jong ki paidbah.
“Ka saiñ pyrthei ka dei kaba kyntang kum ka shong kha shong man bad ym lah ban lehkai ïa ka saiñ pyrthei. Kum ki nongmihkhmat ki dei ban saiñdur ïa ka lawei jong ki longdien bad ki pateng khamtam ïa ki khun samla bad ka jingwan jong ka VPP ka long ban ïaid lang bad ki paidbah ban ïalam ïa ki sha ka thong”.
