Gangtok, Jymmang:
Na ka liang jong ka Football Players’ Association of India (FPAI) mynta ka sien ka lah pynlong ia ka prokram sam khusnam ba shisien shi snem, ka Indian Football Awards(IFAs) ka ban pynlong ha Paljor Stadium kaba ha Gangtok, Sikkim.
Kumta ha katei ka jingsam khusnam, ka kynhun Mumbai City FC kaba long ruh ka lahduh ha ka Indian Super League (ISL) Shield ka lah khur haduh lai tylli ki khusnam na katei ka prokram. Shuh shuh ha kaba iadei bad katei ka bynta, u khlur ialehkai Wing katei ka kynhun u Lallianzuala Chhangte bad u rangialehkai shapdeng ba tbit tam jong katei ka kynhun ialehkai u Greg Stewart ki lah khur ia ka khusnam ‘Indian Player of the Year’ bad Foreign Player of the Year’. Kumjuh ruh u nongpyniaid bahakhliehduh jong katei ka kynhun ialehkai u Des Buckingham u lah shah pynkup burom da ka khusnam ‘Coach of the Year.’
Ka khubor ba lah ioh lum ka iathuh ruh u khlur ialehkai ba pawkhmat ka Bengaluru FC u Sivasakthi Narayanan u lah shah bishar kum u nongjop ia ka khusnam ‘Youngest Player of the Year.’
Kumba ka ju long hi, ia katei ka prokram sam ia ki khusnam sha ki nongialehkai phutbol ka ri India, ka long ka prokram ba ju pynlong man la u snem ia kaba lah sam ia ki khusnam da ka FPAI ha ki kyrdan bapher bapher katkum ka jingioh jingkyrshan bad jingjop ki nongialehkai lyngba ki vote ia kaba lah ai sha kita ki nongjop da kiwei pat ki nongialehkai kiba lah pynrung kyrteng ialade bad ithuh ia ki kum ki nongbishar.
Kumba haduh 400 ngut kita ki nongialehkai kiba lah pynrung kyrteng ialade ki lah shimbynta ha ka jngiathep vote ha kane ka kynti ba mynta jong ka prokram. Ka khubor ka iathuh ruh ba ia ka jingpynlong ia ktei ka prokram mynta u snem, lah iasnohktilang ruh ha ka ban pynlong da ka Football Development Private Limited (FDPL) bad ka Football Players’ Association of Sikkim (FPAS).
Hangne ka thup kyrteng jong baroh ki nongjop kiba lah khur ia ki khusnam bapher bapher:
Indian Player of the Year (Woman): Grace Dangmei
Young Indian Player of the Year (Woman): Naketa Bishnoi
Young Player of the Year: Sivasakthi Narayanan
Indian Player of the Year: Lallianzuala Chhangte
Foreign Player of the Year: Greg Stewart
Coach of the Year:Des Buckingham.
