Shillong, Jymmang 15:
U nongbishar ba la shongthait, u Justice B.P. Katakey, u la lap dalade ïa ka jinglum thup ïa u dewïong hajan ka thanat Shallang, West Khasi Hills bad la suba ba ïa une u dewïong la tih bad kit be-aiñ.
Kane ka la paw ha ka kaiphod kaba 13 jong u Justice Katakey ïa uba ka Meghalaya High Court ka la thung kyrpang ba un peit bniah la ka sorkar ka la pyntreikam ne em ïa ki hukum ka Supreme Court, High Court bad National Green Tribunal ha kaba ïadei bad ka jingpynsangeh ïa ka jingtih bad jingkit dewïong be-aiñ.
Haba kynthoh halor ka kaiphod jong utei u nongbishar, ka High Court ha ka Lah Sngi U Blei ka la ong ba u Justice Katakey u la leit jngoh dalade ïa ka thaiñ Shallang bad Kyllonmathei ha West Khasi Hills ban peit ïa ka jingtreikam jong ki karkhana thang dewïong bad karkhana saiñ nar.
Ha kane ka jingleit jngoh, la lap ïa shibun bah ki karkhana thang dewïong kiba la ïeng khlem da ïoh jingbit na ka Meghalaya State Pollution Control Board. Katkum ki jingbthah ba la ai ha kawei pat ka mukotduma (PIL No. 9 of 2022), u nongmudui u la leit ïakynduh ïa u Justice Katakey bad une u nongbishar ba la shongthait u thmu ban leit jngoh sa ïa ka East Jaiñtia Hills ha ka taïew khatduh jong u Jymmang.
Ha ka kaiphod jong u Justice Katakey, la kdew ïa ka jingdon jong kiba bun ki jaka lum thup ïa u dewïong ha ki thaiñ Shallang bad Kyllonmathei. La lap ruh ïa artylli ki jaka lum thup ïa u dewïong ki barit kiba don habar ka jaka ba ïeng ka thanat Shallang.
Harud jong ka National Highway No. 127B, bad kaba jngai kumba 2 km na ka thanat Shallang, ki la don ki jaka lum thup ïa u dewïong bad la kah ïa ki da ki plastik. Nalorkata, ka kaiphod ka la kdew ba la lap ïa artylli ki trok kiba kit dewïong, kawei kaba don ïa u nombor ML 05 – K – 0917 bad kawei ka bym don nombor.
Shuh shuh ha ka kaiphod la ong ba ar bnai shwa jong ka 10 tarik Jymmang, ym shym la don satia ki jaka lum thup ïa u dewïong lait noh ha ka Depot No. 9 kaba dei ka jaka lum thup kaba long aiñ, bad u dewïong ba la lap ha baroh shi lynter u dei uba la shu tih bad kit be-aiñ.
Ka la ong ruh ka jingpyni ha ka kaiphod ba kam shym la don kano-kano ka jingleh eiei na ka liang ki bor ba dei peit la ki dei ki pulit ne ki babu sorkar katkum ki kyndon jong ka Mines and Mineral (Development and Regulation) Act, 1957 halor ka jinglum thup bad jingkit be-aiñ ïa u dewïong. Kam shym don ruh wat tang kawei ka jingujor kaba la ai.
U Justice Katakey u la ong ba kam shym la don ka jingpyrshang na ka liang ki pulit bad ki bor sorkar ban pyntikna mano ba dei trai ïa u dewïong, ki trai jong ki jaka ba la lum ïa u dewïong bad kiei kiba la donkti ban kit ïa u dewïong. Kam shym la don ruh ka jingujor ne ka jingbuh ejahar ha thanat Shallang pyrshah ïa kitei ar tylli ki trok kit dewïong.
Katkum katei ka kaiphod, la suba ba ka lah ban don ka jingkit tuh ïa u dewïong ba la tih be-aiñ na ka thaiñ Kyllonmathei sha ki karkhana thang dewïong kiba la treikam be-aiñ.
Ka High Court ka la ong ba la dep ban pyntip sha ki heh ki haiñ jong ka sorkar ha kaba ïadei bad ka jingtih bad jingkit dewïong be-aiñ. Namarkata, ka High Court ka la bthah ïa u Chief Secretary bad u heh duh ki pulit (Director-General of Police) ba kin ai da ka jingthoh halor ka jinglap jong u Justice Katakey kumba la kdew ha katei ka kaiphod.
Ha kita ki jingthoh jong u Chief Secretary bad u DGP dei ban kdew ruh ba balei baroh arngut kim dei ban ngat ha ki kyndon jong ka jingleh pyrshah ïa ki hukum ka High Court namar ki khlem leh eiei bad ki la pulom ban peit ba kam dei ban don ka jingtih bad jingkit dewïong be-aiñ.
Ka High Court ka la ai jingmut ïa kitei ki heh sorkar ba kin pule ïa ki hukum jong ka NGT bad Supreme Court kiba la khang ïa ka jingtih dewïong be-aiñ.
“Kane ka dei kaba kongsan tam namar ka jylla mynta ka thmu ban plie noh ïa ka jingtih dewïong kaba long katkum ka juk stad saïan. Kan ym biang satia lada na ka bynta shi kynhun ki briew kiba hap ban tih dewïong katkum ka juk stad saïan kin hap ban siew ïa ka bai laisen bad ka khajna, katba na ka bynta kiwei pat, kin ïoh ban tih be-aiñ katba ki mon khlem da ïoh jingbit eiei lane khlem da siew khajna sha ka sorkar,” la ong ka High Court.
