Kohima, Jymmang:
Ki kynhun paid riewlum kiba na ka jylla Nagaland bad na kiwei kiwei ki jylla jong ka ri India ha ki khyndiat sngi kiba la leit noh ki la kyrpad ïa u Myntri Rangbahduh jong ka ri – Narendra Modi ba un kmih bniah bad pynïaid hi da lade halor ki kam kren ïasuk jong ka jylla (Naga Peace Talk).
Ïa katei ka jingkyrpad sha u Myntri Rangbahduh jong ka ri la pynpaw da kitei ki kynhun paid riewlum hadien ka jingkut jong ka jingïalang ba la pynlong da ka Naga people’s Movement for Human Rights (NPMH).
Na ka liang ka NPMH ka la pynlong ïa katei ka jingïalang ba na ka bynta ban ïasyllok halor ki mat kiba ïadei bad ki kam kren ïasuk jong ka jylla.
Nalor ki kynhun trei kam bapher bapher kiba na ka jylla Nagaland, ha katei ka jingïalang la wan ban ïashim bynta lem ruh da ki nongïalam jong ki kynhun treikam kiba ba ka kynhun jaitbynriew Adivasi kiba dei na ka jylla Madhya Pradesh, Rajasthan bad Maharashtra.
Ha katei ka jingïalang la wanrah ruh ïa ki 2 tylli ki mat kiba kongsan eh kiba dei na ka bynta ban pyntyllun ïa ki kam kren ïasuk jong ka jylla. Ha katei ka jingïalang, na ka liang ki nongïalam ki la ai ïa ka jingïaroh halor ki sienjam jong ka sorkar ban pynsdang bad bteng biang ïa ki kam kren ïasuk bad ki kynhun kieng atiar jong ka jylla. Ki la pyntip ruh ba ka ‘Framework Agreement’ kam dei ka tang ka soskular kaba kongsan na ka bynta ki kam kren ïasuk, hynrei ka dei ruh ka soskular ka ban pynïaid ïa ki kam bad pyntyllun ïa ki sienjam kiba ïadei bad ka kren ïasuk, bad kumta dei ban burom bad kheiñ Kordor ïa ki kyndon jong katei ka soskular na ka bynta ka suk ka saiñ ha ki thaiñ Naga.
Na ka liang ki nongïalam ki la pyntip ruh ba ka jingduna jong ka jingshim ïa ki sienjam naduh ba la dep ban soi ïa ka ‘Framework Agreement’ kan lah ruh ban wanrah ïa ki jingthut ha ka liang ka shong suk shong saiñ.
Kum ban shu ïathuh hangne, ïa ka ‘Framework Agreement’ la ïasoi hapdeng ka Sorkar Pdeng bad ka NSCN-IM ha ka 3 tarik u Nailar jong u snem 2015.
Dang shen na ka liang ki nongïalam jong ka NSCN-IM ha ka jingpyllait kyrwoh jong ka seng, ki la pyntip ba ïa ka ka soskular jingïasngewthuh jingmut ka ban ban pdiang hapdeng ka sorkar India bad ki kynhun Naga la dep ban batai bniah bad mynjur kat kum ki kyndon jong ka ‘Framework Agreement’ ba la dep soi ha ka 3 tarik u Nailar, 2015 – ha kaba ïa ka ‘sovereignty’ jong ki paid Naga la mynjur ba kan ïaid ryngkat ryngkat bad ïadei bynta bad ka ‘Naga National Flag’ lem bad ka Konstitushon.
