Mairang, Jymmang 15:
Ka Voice of the People Party (VPP) hapoh ka jingïalam u Bah Ardent M Basaïawmoit ha ka Lah Sngi U Blei ka la hiar sha ka shnong Kynshi Mawsarong ha Eastern West Khasi Hills ban pynlong ïa ka jingïalang pynrung dkhot thymmai hapoh ka Mawthadraishan Konstitwensi da ka jingthmu ban nang pynkhlaiñ shuh ïa ka seng na ka bynta ka jingpynkhreh ïa ka ilekshon MDC ha u snem 2024.
Ha kane ka sngi la ïohi ba da ki spah ngut ki paidbah napoh ka Mawthadraishan Konstitwensi ki la mih shakhmat ban leit pynrung kyrteng ïalade bad ka seng VPP ha ka jingsakhi lang ruh da u Bah Brightstarwell Marbaniang, MLA Mawlai, u Bah Adelbert Nongrum MLA ka North Shillong bad u Bah Heavingstone Kharpran MLA ka Mawryngkneng nalor kiwei kiwei.
U Bah Ardent haba kren ha katei ka jingïalang u la ong, “Lada ngi ïoh ïa ki nongmihkhmat kiba don ïa ka jingkitkhlieh ngi la dei ban long kiba riewspah tam napdeng kiwei pat ki jaidbynriew bad ka jylla kaba kiew tam ha ka ri India naba ka don ka khyndew kaba seisoh, ki lum ki wah kiba khring ïa ki khmat jong ki nongjngohkai pyrthei, hynrei dap sa tang ka jingkhang suda.”
U la ong ruh ba lada ka VPP ka ïoh ban synhar kan ym khang ban pom dieng, ban tih maw khat shyiap, tih dewïong hynrei kan hikai ïa ki paidbah khnang ba lada ki trei kan ym ktah ïa ka mei mariang kaba U Blei u la buh bad ka dei ka kamram jong ka sorkar ban ai ïa ki jinghikai.
Nangta u Bah Ardent u la kren ruh halor ka jingkob ka sorkar MDA ba la plie dewïong ha kaba na ka liang jong u, u la pynpaw da kaba ong, “Kumno plie dewïong haba tang saw ngut kiba lah ban tih dewïong bad kita ki saw ngut ruh ki dei kiba la ïoh ïa ka ‘mining lease’ na ka sorkar India; kaba mut ba ka sorkar India ka la long trai ïa ki marpoh khyndew ha ka jylla, bad lada ka sorkar ka don ïa ki aiñ kiba khlaiñ halor ka jinglong trai jong ki marpoh khyndew, ka sorkar India kan ym lah ban tuklar ïa kino kino ki jinglong trai jong ka jylla”.
U la bynrap ruh ba namar kata ka donkam ïa ki aiñ bad ym lah ban weng ïa ki namar u briew khlem ki aiñ um ïapher na u mrad. Ka donkam ïa ki aiñ bad ki aiñ kim dei ban pynduh bam ïa ki paidbah, hynrei ka dei ban hikai ïa ki paidbah kumno ban kamai ban trei bad ban burom ïa ka mariang kaba U Blei u la buh.
Haba kren halor ka VPP, u Bah Ardent u la ong ba haba phi long ki dkhot jong ka VPP lada ka seng ka pynïeng MDC ïa u briew jong ka seng dei ban kyrshan, bad lada pynïeng MP ïa u briew jong ka seng dei ban kyrshan namar mynta kan phah sha Delhi ïa u briew u ban wad ïa ka jingeh jong ka jaidbynriew uba ym pat don haduh mynta uba lah ban rah ïa ka jingeh jong ka jaidbynriew.
Nalor kata, u la ong ruh ba ka thong jong ka VPP ka long ba kan kurup ïa ka bor ha KHADC bad JHADC ha u snem 2024 ban wanrah ïa ka jingkylla. U la bynrap ruh da kaba ong, “Ka jingjop jong ka VPP ïa ka ilekshon sha ka District Council kan pyni ïa kine ki seng baroh ba mynta u paidbah ha ka jaidbynriew Khasi un ai ka jingshaniah tang ïa ka VPP.
Haba kren halor ka jingdawa ban pynsangeh shuwa ïa ka thung kam thung jam u la ong, lada ka sorkar ka dang ïai pyneh ka seng ruh kan nang pynkhlaiñ shuh shuh ïa ki jingïakhih haduh ba ka sorkar kan hap ban kohnguh namar ka jingdawa jong ka seng ka long ba ki dawa ïa ka hok bad kaba shong hok shong nia.
“Ngim kwah ban pynduh ïa ka Reservation Policy na ka bynta kiwei pat, hynrei ka jingkwah ka long kaba shong hok katkum ka jingdon paid,” la ong u Bah Ardent.
Kumta u la ong ruh ba hadien ba la dep ïa ka reservation policy, kin sa dawa na ka sorkar ban weng noh ïa kiba ai kam ïa ki ophisar kiba la shongthait bad kin ym shah ba ka sorkar kan shu pynsyrwa kai ïa ka pisa jong u paidbah.
