Shillong, Jymmang 15:
Ka dur kaba la saphriang ha ka Lah Sngi U Blei ba la shon lang u President ka Voice of the People Party (VPP), u Bah Ardent Miller Basaïawmoit bad u nongkren ilekshon uba la paw ha Sohïong konstitwensi, u Bah Amazing Kurbah, ka la pynsuba ba u Bah Amazing u lah ban leit pynïasoh noh bad ka VPP.
Ha kane ka sngi, shi kynhun ki dkhot ka VPP hapoh ka jingïalam jong u Bah Ardent ka la leit ban ïakynduh ïa u Bah Amazing ha ka shnong Rangshken kaba hap ha Sohïong konstitwensi. Na ka liang ka VPP ka la pynmih ruh ïa ki dur ki dar jong ka jingïakynduh jong ki nongïalam ka seng bad une u samla rangbah uba la pawnam bha ha kane ka ilekshon kaba dang shu dep shen ha Sohïong.
Lah ban kdew ba u Bah Amazing u la mih shakhmat ban ïalap ilekshon na bynta u kyrtong ka United Democratic Party (UDP), u Bah Synshar Kupar Roy Lyngdoh Thabah. Ha kane ka ilekshon, u Bah Synshar u la pynliem ïa u kyrtong ka National People’s Party (NPP), u Bah Samlin Malngiang, uba dei ruh u Myntri sorkar barim da lai hajar tam ka ‘vote’.
Wat la ka VPP ka khlem pynmih ïa kano-kano ka jingthoh halor ka jingthmu jong ka jingïakynduh hapdeng ki nongïalam ka seng bad u Bah Amazing, hynrei ki tyllong khubor ba la ïohlum ki ïathuh ba hadien katto katne por, une u nongkren paidbah ba shyrkhei u lah ban rung noh sha kane ka seng ba la ïalam da u Bah Ardent.
