D. H. Kharkongor
Lait na u Samlin, u kyrtong uba la rem noh jong ka NPP lem bad ki MLA jong ka NPP, ba kiwei kiwei pat te kim ia sngewphylla ne shaiong ngain ia kane ka jingjop donburom jong ka UDP ia ka Sohiong Assembly Constituency. Wat lada da kane ka jingjop ka UDP ka la kynjoh mynta sha ka 12 ngut ki MLA, ha ka Iing DorbarThawain kaba 60 ngut, pynban kane ka Sorkar MDA 2.0 ba la lamkhmat da ka NPP, ka dang skhem hi triang. Kane ka Sorkar MDA 2.0 ka skhem, kan neh bad yn dang iai lam khmat hi ruh ia ka da ka NPP tat haduh kaba kut kine ki san snem. Kane ka Sorkar MDA 2.0 ban iai lamkhmat da ka NPP kan skhem bad kan neh wat lada ka bapli ka UDP kan weng noh ia ka jingkyrshan ka jong ka.
Kane ka Sorkar MDA 2.0 kan skhem bad kan neh tat haduh kaba kut kine ki san snem wei ba ka UDP kam shym la nud bad kan nym nud hi ruh ban weng noh ia ka jingkyrshan ka jong ka. Ka bapli ka UDP, la ka la kob ka la sob, pynban kam shym la lah, kam pat lah bad kan nym lah thaw pyrthei ei ei ruh em. Ka bapli ka UDP kannym lah ban pynkhyllem jrain ia kane ka Sorkar MDA 2.0 kumba kan nym lah ruh de ban lamkhmat ha kaba thaw da kawei pat ka Sorkar kaba thymmai. Kaba sngewdanda ka long ba ka bapli ka UDP ka nang pynshkem pynban ia kane ka Sorkar MDA 2.0, kata, da kane ka jingjop ka jong ka ia ka Sohiong Assembly Constituency. Ka la nangiai paw shai ruh de ba wat kine ki ar, ka UDP bad ka NPP, ki ia long pynban kawei. Ka UDP kan dang iai long hi tang kum u ksai uba hap ban shu bud tdong ia ka jingialam jong ka NPP kaba dei u thyrnia.
Ka UDP kan nym nud ban weng noh ialade na kane ka Sorkar MDA 2.0. Kita kiwei ki dkhot jong ka MDA 2.0 ruh kin nym treh, da lei lei ruh em, ban ia mihlang noh lem bad ka UDP kat ban ia iehnoh marwei ia ka NPP. Kin nym treh ia bud tdong ia ka UDP, kata,ban ia leit ban ia shong lang noh bad ka sha ka liang pyrshah ne ka ‘opposition’ lem bad ka INC, ka TMC bad ka VPP. Lah ruh ban ong ba kane ka jingjop jong ka UDP ia ka Sohiong Assembly Constituency ka dei hi ka jingjop jong ka Sorkar MDA 2.0, ba la lamkhmat da ka NPP. Na kane ka jingjop jong ka UDP ia ka Sohiong Assembly Constituency ba ka MDA 2.0 ka lah kynjoh pynban mynta, na ka 45, sha ka 46 ngut ki MLA katba ka bapli ka liang pyrshah pat de ka shu iaisah hi tnoit tang 14 ngut ki MLA. Ka jingiohnong na kane ka jingjop jong ka UDP ia ka Sohiong Assembly Constituency ka long ia ka MDA 2.0. Ka jingduhnoh pat de ka dei ia ka bapli ka liangpyrshah.
Ka UDP kan nym nud ne kan nyn treh ban weng noh ialade na kane ka Sorkar MDA 2.0. Kan nym treh ban leit shong liang pyrshah. Ka bapli kan nym hun ban shu long tang ka nonglamkhmat ia ka liangpyrshah. Kaba pli ka UDP kaba tang 12 ngut ki MLA kannym nud ban mih noh naba wat khlem ma ka (UDP) ruh kane ka Sorkar MDA 2.0 kan dang iai don hi ia ka jingbun paid, kata, kaba haduh 34 ngut ki MLA. Kum ka jingpynkymaw ba kita ki 34 ngut kin dei kine hi ki 26 ngut ki MLA jong ka NPP, kine hi ki 2 ngut ki MLA jong ka BJP, kine hi ki 2 ngut ki MLA jong ka PDF, kinehi ki 2 ngut ki MLA jong ka HSPDP bad ruh kine hi ki 2 ngut ki MLA shimet. Ngim dei ruh ban klet ba ia mynta lei te ka NPP bad ka PDF ki lah da ia long shisha kawei.
La ka bapli ka UDP ka la kob ka la sob pynban ka bapli kan nym nud ban wengnoh ialade na kane ka Sokar MDA 2.0, kata, ban weng noh shisyndon ia ka jingkyrshan ka jong ka ia kane ka Sorkar MDA 2.0, ba la lamkhmat da ka NPP. Ka bapli ka UDP kaba don tang 12 ngut ki MLA ka tieng ka smiej pynban ioh ba kan shah weng noh na ka Sorkar MDA 2.0. Ka bapli ka tieng ka smiej wei ba tip shai ba kannym lah thaw pyrthei ei ei ruh em. Ka UDP ka tip shai ba kan nym lah ban pynkhlem ia kane ka Sorkar MDA 2.0 kumba kan nym lah ruh ban thaw bad lamkhmat ia ka Sorkar thymmai, kata, tang bad kine ki 14 ngut ki MLA kiba don mynta ha ka liang pyrshah. Ki 12 ngut ki MLA ki jong ka UDP lem bad kine ki 14 ngut ki MLA kiba don mynta ha ka liangpyrshah kin dang kot tang 26 ngut, ha ka Ing Dorbar Thawain kaba 60 ngut ki MLA, ba kumta kin nym pat kotbor ne kot ka jingdon briew kat ba kin ia thaw Sorkar.
Ngim dei ban sngewphylla lada ka NPP kam banse ban ieh ia ka UDP ha ka mon kaba laitluid ka jong ka (UDP), kata, la ka UDP kan dang ieineh ban kyrshan ia ka Sorkar MDA 2.0 ne la kan weng noh bad kan mih noh na ka Sorkar MDA 2.0.La kan iaineh ne kan mih noh ruh kan nym ktah ei ei ruh em ia kane ka MDA 2.0 ia kaba yn dang iailam khmat hi da ka NPP. Ngim dei pat ruh ban sngewphylla lada ka UDP kan dang iaisnoh hi rdin, kum u dkhiap, ia ka NPP tad haduh kaba kut jong kine ki 5 snem. Lah ban ong ba wat la ka NPP kan wit, kan salia bad kan kynther katba kynther ia ka UDP pynban ka UDP kan iaisnoh hi rdin ia ka, kumba ka ju snoh hi rdin mynnor ia ka INC, tad haduh kaba kut ki 5 snem. Kum ban shu ong noh la ka NPP kan beh ia ka UDP da ki ktien kiba khor katno katno ruh ka bapli ka UDP, kaba khlem dor khlem bor, kan nym mih hi tdot na kane ka Sorkar MDA 2.0.Te tad lano bad kaba kumno pat kein kata ka jingkylla?
