Shillong, Jymmang 15:
U Myntri ka tnat bording ka Sorkar Jylla, u AT Mondal u la leit khmih hi dalade ïa ka jaka ba den ïa ka pung Umïam ha kaba la synran lang da ki ophisar na katei ka tnat bad ka Meghalaya Energy Corporation Ltd (MeECL).
La ong ba kane ka jingleit peit hi u Myntri ka long ban sngewthuh ïa ka jingshngaiñ kane ka jaka ba den ïa ka um bad jingkieng nalor kaba ïaid ki kali man la ka sngi namar ba la donkam ban maramot ïa ki bynta kiba donkam.
La ong ba nalor ki karikor ka MeECL, la don lang ruh ki riewshemphang kiba dei jong ka IIT Guwahati.
Ka jingrngat ka um ha pung Umïam bad ka jingnang hiar ka um, ka la pynskhuslai ïa ki paidbah namar ka jingkyrduh bording ilektrik ka la nang shyrkhei.
