Shillong, Jymmang 15:
U Symbud Myntri Rangbah ka Jylla, Bah Sniawbhalang Dhar, u la ong ba u la bthah ïa u Deputy Commissioner (DC) ka West Jaiñtia Hills ba un thaw noh da ka ‘Peace Committee’ ban wanrah pat ïa ka shongsuk shongsaiñ ha ka shnong Khanduli, West Jaiñtia Hills District.
“Nga la dep ban ai jingmut ïa u Deputy Commissioner jong ka West Jaiñtia Hills ban thaw noh ïa ka Peace Committee namar balei ba kine ki ar Jaidbynriew (Khasi-Pnar bad Karbi) kin dang bteng ban ïaleh pyrshah na ka por sha ka por,” la ong u Bah Sniawbhalang haba kren sha ki lad pathai khubor ha ka Lah Sngi U Blei.
Ha kajuh ka por utei Symbud Myntri Rangbah u la pyntip ba u Deputy Commissioner ka West Jaiñtia Hills un sa ïashong jingïalang bad u Deputy Commissioner ka West Karbi Anglong District lashai ka sngi ka 16 tarik Jymmang ha kaba la ban jur ïa u DC halor ka jingdonkam ban thaw noh ïa ka ‘Peace Committee’.
Katkum ka jingïathuh u Bah Sniawbhalang, ka jinglong jingman kumba ka long mynta ha Khanduli ka la jai jai bad ym shym la don shuh kano kano ka jingjia ba thymmai ne huri-hura ka ban mih na kane ka thaiñ.
Shuh shuh u Bah Sniawbhalang u la ong, “Ngi la kyrpad ruh ïa ki paidbah nongshong shnong na baroh arliang mamla ba kin nym ïa pyndom pynshrai markylliang.”
Haba kylli halor ka daw jong ka jingïakynad, u Symbud Myntri Rangbah u la ong ba ki paidbah ki la pyrshah ïa ka jingpynïeng khyrdop lum khajna na ka liang ka Assam ha Khanduli.
“Ym tang ha ka kyrdan u Chief Secretary, hynrei ngin sa rah ban ïakren ruh ïa kane ka kam ha ka kyrdan jong ki Myntri Rangbah ka Jylla,” u la ong bad bynrap ba lyngba ka jingshimkhia bad ïakren jong u bad u Myntri Rangbah ka jylla ba kane ka jingïakynduh jong ki DC kan sa long lashai ka sngi.
Lah ban pynkynmaw ba ha ka Sngi Palei jong ka taïew ba la dep, ka jingïakynad ka la mih hapdeng ki Khasi-Pnar bad ki Karbi ha ka shnong Khanduli. Ki nongshong shnong ki la pyrshah ban pynïeng ïa ka khyrdop lum khajna da ka Karbi Anglong Autonomous Council.
Ka jingïakynad ka la mih hadien ba ka Dorbar Shnong jong ka Khanduli ka la rai ban pyrkhing ïa ki briew na ka jaidbynriew Karbi ban ïaid lyngba ka shnong. Kane ka rai jong ka Dorbar Shnong ka la mih hadien ba ki Karbi ki la byrngem ïa ki nongshong shnong Khasi-Pnar ba kin leit sha ki jaka rep.
Kane ka jingkulmar ka la poi sha u pud ka jingïalun maw bad ïashoh ïadat bad ka jingshah wiang ding jong ar tylli ki ïing trep.
Ha kane ka jingjia, ka kali jong u Superintendent of Police ka West Jaiñtia Hills ruh ka la shah lun maw, hynrei u SP lem bad ki nongbud ki la lait phet da ka said khlem kano kano ka jingmynsaw lait noh tang ka jingjulor malu-mala jong ka kali.
