Ziro, Jymmang:
Ha ka sngi Saitjaiñ kaba la dep la ïoh jingtip ba palat 1 lak tylli ki tynrai syntiew la thung ha shi lynter jong ka surok bah NH-13 kaba don ha ka thaiñ Lower Subansiri district jong ka jylla Arunachal Pradesh.
Kat kum ki jingïoh lum khubor la ïathuh ba ïa katei ka rynsan thung Syntiew la pynsdang naduh ka khyrdop pulit kaba don ha ka thaiñ Ziro (Siibey) tad haduh ka thaiñ Pine Groove. Ha katei ka rynsan la wan ban ïashim bynta da palat 3000 ngut ki paidbah kiba kynthup ïa ki khynnah/samla pule, ki nongïalam panchayat, ki dkhot jong ki seng treimon sngewbha bad seng bhalang bapher bapher, ki paidbah nongshnong shnong, ki dkhot jong ki komiti iew, ki nongtreikam sorkar bad kiwei kiwei.
Ïa katei ka rynsan thung syntiew la lah ban pynlong lyngba ka jinglah jong u ZPM ka 13-Reru Kalung – Subu Lento ban shim ïa ki sienjam kiba kyrpang na ka bynta ban wanrah ïa ka khuid ka suba bad jingjyrngam jong ka thaiñ Ziro.
Ha katei ka rynsan la wan ban ïashim bynta lem ruh da u MLA ka thaiñ – Tage Taki u ba la ai jingkren bad ong ba ka dei ka kamram jong uwei pa uwei u nongshong shnong ka thaiñ ban pynneh pynsah ïa ka khuid ka suba bad ka jingitynnad jong ka thaiñ Ziro – kaba dei mynta kawei na ki jaka jngohkai pyrthei kaba bna nam eh ha ka jylla Arunachal Pradesh.
Kiwei kiwei ki heh ki haiñ kiba la wan ban ïashim bynta lem ha katei ka rynsan thung syntiew ki kynthup ïa u MLA Nyato Dukam, Lower Subansiri DC Bamin Nime, Myntri barim ka sorkar jylla – Padi Richo, president barim ka ACWA – Takam Padu, chief engineer ka PWD – Dani Gambo, director ka skill development & entrepreneurship – Subu Tabin, managing director ka PHC, contractor jong ka NH-13 TAH – Puna Hinda bad kiwei kiwei. Halor katei ka rynsan thung syntiew, na ka liang ki nongïalam jong ka Kalung Reru panchayat ki la pyntip ba ïa katei ka rynsan yn dang pynbteng sa ha kane ka taiew kaba mynta. Na ka liang u DC ka thaiñ u la pynbna ban synniang T.2 lak na ka bynta ka kynhun ka ban khmih bniah bad sumar ïa ki syntiew kiba la thung ha katei ka sngi.
