Shillong, Jymmang 15:
Ka Myntri ba khmih ïa ka tnat ka rep ka riang jylla, ka Kong Ampareen Lyngdoh, ka la ong ba na ka liang ka tnat ka la phah ban tohkit halor ka jingkynnoh ba ka don ka jingkhleh da ka dawai ‘urea’ ha u khaw rashon ba la sam sha ki paidbah ha kine khyndiat sngi ba la dep.
Haba kren sha ki lad pathai khubor ha ka Lah Sngi U Blei, ka Kong Ampareen ka la ong ba ka jingtohkit halor kane ka la phah naduh ka janmiet jong ka 13 tarik u Jymmang, 2023. Ynda la ïoh ïa ka kaiphod halor kane, ka tnat kan sa peit la ka don shisha ne em kum kata ka jingjia bad hadien kata yn sa bteng kumno ka jia kumtei.
“Ngi la phah tohkit ïa kata naduh myn shisngi ka janmiet bad ki dang phah ïa kata ka nongmuna (sample) jong uto u khaw uba ki kynnoh ba don lang bad ka ‘urea’ sha ka jaka kaba phah test,” la ong ka Kong Ampareen.
Shuh shuh ka Kong Ampareen ka la ong ba ka jingphah tohkit kan shimpor kumba ar ne lai sngi eiei bad ynda la ïoh ïa ka kaiphod, ka tnat kan sa ai ïa ka jingtip halor ka kaiphod sha ki lad pathai khubor.
“Kumba ka long mynta hi, ki la leit jurip kloi kloi sha kata ka jaka bad ngi dang ïai ap ïa ka kaiphod jong kata ka test,” la ong ka Myntri.
Ka la ong ba ïa mynta kan nym pat lah ban ong eiei halor kane, hynrei kan ïai peit shwa la ka don shisha ne kam don shisha kum kata ka jingleh hadien ba la ïoh ïa ka kaiphod.
“Ngin hap peit kumno kata ka long, ka don ne kam don shisha kum kata. Ngi la phah ban phah tohkit ïa kane, ai kan wan shwa ka kaiphod bad ngin sa wad pat ban bteng shuh shuh kumno ka leit jia kumta bad kam dei ban jia kumta, bad ngi dei ban phikir ba kane ka long kaba donkam bad ngin nym shah ïano ïano ban leh kum kane ka jingbakla namar kam bha bad ka long kaba ma haduh katta katta,” la ong ka Kong Ampareen.
