Shillong, Jymmang 15:
Ka Umrit SC bad ka Mulait United ki la khur ïa ka jingjop ha ka sngi kaba lai jong ka lympung ïalehkai Meghalaya State League 2023 ha ka Lah Sngi U Blei.
Ha ka jingïakhun jong ka Shillong Zone (Group-A) kaba la long ha madan Third Ground, Polo, ka Umrit ka la pynliem noh ïa ka Seng Samla Laitryngew da 3-1 kol.
Ha kane ka jingïakhun, u Khimlang Thangkhiew u la ïoh ban thep ïa ka kol kaba nyngkong ha ka minit kaba 26. Hadien katto katne por ki ar ngut ki rangïalehkai ka Umrit ki la ïoh ban rah ïa ka bol bad kim shym lah pat ban pynurlong, hynrei u Khimlang u la lah ban pynurlong ïa kane ka jingpyrshang.
Hadien kata, u Wanroyshang Sangma u la ïoh ban thep ar kol (45’+2, 53′). Ka kol ba nyngkong ka la wan urlong lyngba ka jingïoh ban shut na jngai bad kawei pat ka dei kaba u la ïoh najan.
Katba na ka liang ki rangïalehkai ka Laitryngew ki la pyrshang ban ïakhun tyngeh ha kaba u Ferenstar Kharkongor u la jan khur ïa ka hat-trick. Une u rangïalehkai u la shah khanglad noh ha u rangïalehkai shadien ka Umrit ha ka minit kaba 61. Hadien kata, u la ïoh ban thep ha ka minit kaba 68 bad ïa kol ba khatduh ha ka minit kaba 81, hynrei um shym, la lah pat ban pynurlong ïa ka ‘hat trick’.
Ha kawei pat ka liang, ka jingïalehkai jong ka Group-D na ka bynta ka Tura Zone ha madan Chandmari, ka Selsella Sports Association ka la ïakhaid mar 1-1 kol pyrshah ïa ka Wasa FC.
Wat la kine ki kynhun ki la ïakhun tyngeh, hynrei hadien shiteng kynta ka Selsella ka la ïoh ban pynkhih jar nyngkong eh lyngba u Threebirth Momin (37′). Ha shwa ban kut ka jingïalehkai ka Wasa FC ka la lah ban pynphai kylla ha ka minit kaba 86.
Ha Mawkyrwat, ka jingïalehkai jong ka Group-C hapdeng ka Seven United SCC bad ka Lumdiengngan SC ki la kut hapdeng ka jingïakhaid mar 2-2 kol ha madan MDSA.
Haba phai sha ka jingïalehkai kaba khatduh jong ka Jowai zone na ka Group-B, ka Mulait United ka la lah ban pynliem noh ïa ka Youth Club Pdengkarong da 2-1 kol ha Kiang Nangbah Stadium.
Ha kane ka jingïakhun ka Seven United ka la ïoh ban thep ar kol ha ka kylla step lyngba u Stevenmark L. Kynshi ha ka minit kaba 22 bad ïa ka kol ba ar la thep da u Mebanlambet Warjri ha ka minit kaba 42. Ka Lumdiengngan ka la lah ban pynphai kylla ar kol ha ka kylla miet lyngba u Donboklang Kynter ha ka minit kaba 74 bad 87.
