Shillong, Jymmang 15:
U Chief Executive Member ka Khasi Hills Autonomous District Council (KHADC), Bah Titosstarwell Chyne, u la ong ba katkum ka jingpynskhem ïa ka Khasi Hills Autonomous District (KHAD) Khasi Social Custom of Linage Act, 1997, ka jingshim jait ha ka jaidbynriew Khasi ka dei na ka kmie, ym dei na u kpa.
Haba pynskhem ïa kane, u CEM u la ong ba ki khun jong u shynrang Khasi uba ïoh kurim da ka bym dei Khasi, yn nym lah ban kheiñ Khasi lada kim leh ïa ka ‘Tang Jait’.
Haba pynpaw ba ka jingkren u Bah Ardent Miller Basaïawmoit, u President ka Voice of the People Party (VPP) bad MLA ka Nongkrem ka long kumba kynnoh shimet, u Bah Titos u la ong, “ka jingong jong nga ba ym lah ban shim jait kpa ka long salonsar ïa baroh, ym ba kdew tang ïa u Bah Ardent.”
U la ong ba ki jingkren jong u Bah Ardent halor ka jingsdang u dak thoh ïa ka jait Khasi da u dak ‘C’ kam dei tang ka kur Chyne, hynrei don kiwei ruh kum ka kur Chen, Cunville bad kiwei.
Da kaba kdew ba ïalade hi u dei uwei uba don bynta kumno ban pynkylla (amend) ïa ka Clan Bill ïa kaba la leh ha ka por u (L) Bah HS Shylla, u Bah Titos u la ong ba ka Executive Committee ba mynta ka la shim khia ban mynjur ïa ka Bill hadien ba la peit bniah da ka Committee ba kyrpang ba khlieh da u Bah Bindo M Lanong ba wat ïa ka rukom thoh jait ki Khasi hap ban pynbeit.
“Ngam dei uba pyrkhat shimet”, la ong u Bah Titos uba la bynrap ruh ba hadien ba ka Bill kan ïoh ïa ka muhor na u Lat ma u hi un dei uba bynta ban pynbeit ïa ka rukom thoh dak ha ka jait ka kur. “Ngi dei ban pynbiang pynbit shwa ban ïalap”, u la ong.
U la ong ba kitei ki jingkynnoh ki long kren khyllung khynnah tang ban ïoh ïa ka jingsngewsynei na u paidbah bad pynbieit ïa u paidbah, hynrei kim tip pat ba ka kyrtoh da kumwei pat.
U Bah Titos u la ong ba kam don kano kano ka jingleh politik haba trei ïa ka kam ha Council namar ki kwah ban pyni kaei kaba ki lah ban leh. “Lai tylli ki Bill ngi la wanrah lyngba kane ka Executive Committee ba mynta bad la dep ïoh jingmynjur”, la ong u Bah Titos.
Da kaba buh jingkylli ba katno tylli ki Bill ba kiwei ki CEM ki la wanrah ne shna, u la ong, “Haba kren da trei bad ym dei ban kren tang ka ktien. Ka Land Bill mano ba lah ban shna, hynrei tang kane ka EC kaba ngi ïoh ïa ka jingmynjur na u Lat”.
U la ther tyngeh ruh ïa ka jingkam kiwei ban leit sha District Council ban ïada ïa ka khyndew ka shyiap, hynrei pynban ym don aiñ ha ka Council bad kawei ka aiñ ruh ka ai aiñ. “Hato ju don ba kren ïa kata, hynrei tang kane ka EC ba wanrah ïa ka aiñ”, u la ong.
Nangta, u la ong ba ka long kaba sngewsih ba kum ki para nongïalam ba ym dei ban kynthoh shimet, bad ha Council haba trei ïa ka kam ym don jingkynthoh ïano ïano wat la don lang lai Party ne saw Party.
“Ngim pyrkhat ba la jan ilekshon ne pyrkhat ïohnong saiñ-hima kumba shah kynnoh, hynrei kiwei keiñ kiba leit ïalap ilekshon bad ngin dang trei ïa kam”, u la ong.
U la ong ba ha ka jinglong nongmihkhmat la ka dei 10 ne 15 snem u paidbah un kylli phi la leh aïu. “Ban kren ka suk, hynrei ka jingkylli kan mih phi la leh aïu”, la ong u Bah Titos.
Ha kawei pat ka bynta u la ong ba ka don ka jingkulmar jingmut ha ka Sorkar Jylla ha kaba ïa dei bad ka jingai syrnod Schedule Tribe namar ka ïadei khamtam bad kiba ai jait kpa.
“Ka tnat Social Welfare ka la thoh kawei ka shithi sha ka Council ha kaba ïa dei bad kane ka jingshim jait kpa bad ka Council ka la ai ka jubab kaba shai ba katkum ka KHAD Khasi Social Custom of Linage Act, ka mut ba kino kino kiba shim jait na u kpa bad kumjuh kino kino kiba ïoh kurim bym dei Khasi khamtam ïa u shynrang uba ïoh kurim bym dei Khasi, ki khun kim lah ban ïoh syrnod lada kim leh ïa ka Tang Jait”, u la ong.
Nalor kata, u la ong ba ha kajuh ka por ruh ka kynthei Khasi ba ïoh kurim bar jylla kan nym lah ban ïoh beit beit ïa ka syrnod na ka bynta ki khun khlem ïoh ïa ka Khasi Tribe. “Nga pynkynmaw sa shisien ba ka EC ka la rai ba ngin kynduh ïa ka Sorkar ba ha kaba ïa dei bad ka jingai syrnod Schedule Tribe dei ban aiti ha ka Council”, u la ong.
