Shillong, Jymmang 15:
Tang khyndiat sngi ba u MLA ka Nongkrem u Bah Ardent Basaïawmoit u la kam ba ym ju don shuh ka jingot kilo ha Ïewduh ha ka por ba long Chief Executive Member (CEM) ma u, ka Executive Committee jong ka Khasi Hills Autonomous District Council (KHADC) lyngba ki Executive Member (EM) ki la sei madan ïa ka hukum ot kilo ïa ki mar rep bad khajna ha ki snem ba mynshwa ha ka por jong u kum u CEM.
Kane ka jingot kilo ïa ki mar rep ka dei ha u snem 2014 ha ka por ba long CEM u Bah Ardent, uba dei mynta u nongïalam ka VPP.
Na ka liang u CEM ka KHADC uba mynta, u Bah Titosstarwell Chyne, u la ong ba ka jingkynnoh u Bah Ardent ba ka Executive Committee ka shong kli-kti ka long kaba ym ïahap satia bad ka bym shisha namar ba ka Council ka la leh la kajong ka kamram.
Ka Executive Member (EM) ba peit ïa ka tnat Market, ka Kong Grace Mary Kharpuri ka la ïathuh ba ha ka jingïalang kaba la long ha ka 28 tarik Naitung, 2014, la rai ban ot kilo bad khajna dei ban leh haba ïadei bad ki mar rep kiba wanrah sha Ïewduh.
Ka Kong Kharpuri ka la ong ba katkum ka rai ha kata ka jingïalang, la ong ba ki mar rep kiba don hapoh 35 kilo kiba wanrah sha Ïewduh ym donkam ban siew khajna, hynrei 35 kilo shaneng haduh 50 kilo dei ban siew T.10 tyngka bad lada dei 51 kilo shaneng hap siew T.15.
Shuh shuh ka la ong ba ha katei ka jingïalang kaba la long ha u snem 2014, la rai ruh ba ki nongthied ïa ki mar jong ki nongrep, kim lah ban ot palat 2 kilo na ka 50 kilo, bad ki mar rep kiba palat 50 kilo shaneng, ka jingot kilo ka dei 3.5 kilo.
Kumta ka Kong Kharpuri ka la ong ba ka jingot kilo ha Ïewduh ka dei kaba la ju don bad dei naduh u snem 2019, ka Hima Mylliem ka la pynmih ïa ka byrta ne ‘notification’ kaba ong ba ka jingot kilo kam dei shuh ban don, bad naduh katei ka por, ym don shuh ka jingud ne jingujor ba shah ot kilo, hynrei kynsan kynsan ka mih biang mynta.
Kane ka Executive Member kaba peit ïa ka tnat Market, ka la ong ruh ba ka jingkynthoh ba ki dkhot ka Executive Committee ki kwah burom haba ki leit sha Ïewduh ka dei kaba ym ïahap satia.
Ka la ong ba ka tnat Market ka KHADC ka la pynjari da ka hukum ba ym dei shuh ban don ka jingot kilo ym tang ha Ïewduh, hynrei ha ki ïew ne ki jaka kiba hap ha ka Council.
Kum ban shu pynkynmaw, ka kynhun ki Executive Member ka KHADC ha ka 11 tarik mynta u Jymmang ki la leit jurip ïa ka ïew dielang ha Ïewduh hadien ka rai ba ki la shim ha ka jingïalang jong ka 10 tarik u Jymmang, 2023 ban nym don shuh ka jingot kilo ïa ki mar rep ha Ïewduh.
Hynrei hadien ba ki dkhot ka EC jong ka KHADC ki la leit sha Ïewduh ha ka 12 tarik mynta u Jymmang, ka Myntri ka tnat kam rep ka Sorkar Jylla, ka Kong Ampareen Lyngdoh ryngkat ki MLA ka VPP kynthup ïa u Bah Ardent ki la leit lang sha Ïewduh.
Dei ha kane ka sngi ba u Bah Ardent u la ïathuh paidbah da kaba kam ba ha ka por ba long CEM ma u, ym don shuh ka jingot kilo ïa ki mar rep.
Na ka liang ka Kong Ampareen ka la ong ba ka jingot kilo ïa ki mar rep ka dei namar ba don ki ’langïong bad ka la kyntu ïa ki nongrep bad ki nongkhaïi ban kiar na ki kam ïashrut bad shukor ha ka kam khaïi pateng.
Ha kawei pat ka liang, halor ka jingshah kynnoh ha u nongïalam ka VPP ba ka jingkhynra laisen khaïi ne Trading License ïa ki bar jylla da ka Khasi Hills Autonomous District Council (KHADC) ka dei kaba shu leh tang mynta, u Executive Member uba peit ïa ka tnat Trade, u Bah Rangkynsai Kharbuki u la ong kane ka jingkynnoh ka dei tang ka jingïalam bakla ïa u paidbah.
U la ong ba ka Enforcement Wing jong ka Council ka buh da ka pali ban khynra Trading License namar ka jingthmu ka long ban khanglad ïa ki bar jylla ban khaïi katba mon ha ki jaka ba hap ha ka Council.
