Rome, Jymmang:
Ka jingiaid lynti jong u khlur ialehkai Tennis ka ri Serbia u Novak Djokovic ha ka lympung ialehkai ba mynta ka Italian Open ka lah long kaba seisoh, ha kaba utei u rangialehkai u lah jam mynta sa sha ka rynsan iakhun pre-quarterfinal da kaba pynliem noh ia u rangiakhun pyrshah u Grigor Dimitrov da 6-3, 4-6, 6-1.
Kumjuh ruh na ka jingiakhun jong ki kynthei ha ka jingiaknieh rung sha katei kajuh rynsan ialehkai, ka khubor ka iathuh ba ka Iga Swiatek ka long kawei na ki thei ialehkai kaba la lah ban pynurlong ia kata hadien ka jingpynliem noh ia ka nongiakhun pyrshah ka Lesia Tsurenko da 6-2, 6-0.
Ha kaba iadei bad ka jingiaid lynti jong kitei ki arngut ha ka lympung, u Novak uba lah rah ia ka nam kum u lahduh ha katei ka lympung ialehkai haduh hnriew sien, mynta u iai khmih bniah halade na ka bynta ka jingiai pynjanai shuh shuh ka rukom ialehkai ka jong u ha ka aiom ialehkai ba mynta jong une u snem.
Kumta ha ka jingiakhun ka jong u, u Novak u lah shah pynrem ha ka jingialehkai ba nyngkong, hynrei uba lah ioh ban pynkhein dor-thong kylla ha kawei ka jingiakhun da haduh saw sien na ka bynta ban khur shalade ia ka jingjop ha ka set ba nyngkong. Ha ka jingsam bol ka jong u, u Djokovic u lah tied ia ka bol Shabar jong u lain na ka bynta ban tam dor-thong shakhmat ha ka jingiakhun kaba lai jong ka set iakhun kaba ar da kaba pynkhein noh ia ki dor-thong jong u Dimitrov.
Hynrei u Dimitrov u lah ioh ban pyniaryngkat ia ka set iakhun da 4-4 da ka jingpynkhein dor-thong ka jong u kaba lah pynbitar ia u Djokovic.
Shuh shuh ka khubor ka iathuh ruh ba u Djokovic u lah dep ruh ha ka ban rung la kumno kumno shaduh ka jngiahun quarter-final ha man la ki 16 sien kiba u lah ioh ban shimbynta ha katei ka rynsan ialehkai ha katei ka lympung iakhun ha Rome.
Na ka jingiakhun jong ki kynthei pat, ka Iga kaba lah shah rem noh kum ka nongiakhun phainal ha ka Madrid Open ba dang shu dep long, sa shisien mynta ka lah ialeh na ka bynta pyntbit ia ka rukom ialehkai ka jong ka da kaba jam mynta sha katei ka rynsan iakhun jong ki kynthei ha ka lympung.
Katei ka nongialehkai ka ialeh ruh na ka bynta ban khur ia ka trophy jingjop kaba lai na katei ka lympung ialehkai da ka jinglah jong ka ban pynliem noh ia ka Tsurenko. Watla ka Iga ka lah shah rem ha ki ar jingiakhun ba nyngkong, hynrei ka lah pynher ka rukom ialehkai jong ka da kaba ialehkai bha bad ba lah pynlong ia ka kata ka lahduh ha ka pyrthei bad kum ka kyrtong ban iada ia ka nam jop ka jong ka ha Roland Garros.
Hadien katei ka jingjop, ka Swiatek ka pynkhreh mynta na ka bynta ka jingiakynduh sa bad ka Donna Vekic; kaba la lah ban pynliem noh ia ka Ljudmila Samsonova da 2-6, 7-6 (7/5), 6-2.
Kumjuh ruh kawei pat ka nongialehkai napdeng ki kynthei ka Coco Gauff na USA ka lah mad ia ka jingshah pynliem noh ha ka Marie Bouzkova na Czech Republic da 4-6, 6-2, 6-2. Ka long ruh ka sien kaba lai ia ka Bouzkova ha ka jingim ialehkai ka jong ka ban jam sha ka thup ba 5, hynrei ka long kaba nyngkong ha ka kam ialehkai jong ka ha kyndew-saw. Kumjuh ruh kawei pat ka nongialehkai kaba lah kut noh ka kam ialehkai jong ka; ka long ka Maria Sakkari kaba lah shah pynliem noh da 7-5, 6-3 ha ka Marketa Vondrousova.
Kumta ka Gauff bad ka Sakkari ka lah pyniasoh ia ka Aryna Sabalenka, Jessica Pegula, Caroline Garcia bad ka Ons Jabeur ha ka lympung. Kumta ka Victoria Azarenka ka lah weng noh na ka lympung da kaba ai sha ka Madison Keys ia ka lynti iaid ban jam sha katei ka rynsan iakhun.
Ha ka jingiakhun jong ki shynrang, u Daniil Medvedev u lah rah ia ka jingjop ba nyngkong ha Rome da 6-4, 6-2 pyrshah ia u Emil Ruusuvuori. Shuh shuh ruh u Stefanos Tsitsipas un sa hap ban iakhun sa bad u Lorenzo Sonego ha ka kylla iakhun kaba lai hadien ka jinglah ban pynliem noh ia u Nuno Borges da 6-3, 6-3.
Kumta ruh u Holger Rune u lah jam da kaba suk pyrshah ia u Fabio Fognini da 6-4, 6-2 na ka bynta ban jam sha katei ka rynsan, hynrei u Jannik Sinner u lah nang iai pynim ia ka kam ialehkai jong u ha katei ka lympung iakhun ha iing da kaba pynliem sa ia u nongialehkai na Russia u Alexander Shevchenko da 6-3, 6-7 (4/7), 6-2.
