Kat nang mih ki sngi, katta ka nang sniew. Ka jingkyrduh bording ha Meghalaya ka long ka bym kut shuh namar ngi hap ban shu shaniah tylli tyllan ha ka jingisynei jong ka mei mariang ban pynhap ïa u slap khnang ba ki shlem pynmih bording kin lah ban trei ha ka rukom kaba dei bad ban pyllait ïa ki nongshong shnong na ka jingdum. Dang shen ha Meghalaya High Court, ka Meghalaya Energy Corporation Limited ka la pyntip ba man la u bnai, ka jylla ka donkam 200 Million Unit katba ka jingdon bording pat ka long tang 88 Million Unit. Sa kawei pat ka daw ba la pyni na kawei pat ka liang ka long ba ka jingduna bording ka dei namar ka jingthut ha kawei na ki shlem pynmih bording kaba don ha Tripura bad ka sorkar Meghalaya kam don lad ban thied bording na kiwei pat ki tyllong.
Ngin leh sa kumno pat? Ngin hap ban shu shah beit ïa ka MeECL ba kan pynlip bording 10 kynta ha ka shi sngi? Shano ki kam ki jam kin poi haba kumne? Ka jinglutksan jong ki nongseng kam seng kam ha kane ka jylla namar ka jingbym biang ka bording kam dei shuh kaba kai. Mano ban buria ïa kata ka jinglutksan kaba la neh mynta la shi bnai tam? Hato ka sorkar ka nud ban wan shakhmat ban ong ba kan buria ma ka ïa ka jinglutksan baroh? Ngi tip ba kam don bad kam don pisa hi ruh ba kan leh kumta. Ngi shu tip ba kane ka sorkar ka dei kaba sngewtynnad ban shim ram khnang ba kan lah ban siew ram lane ban pyntreikam ïa kita ki projek lyngba kita ki ‘Consultant’ kiba wan mih na ka pyrthei sngi jongno ruh. Ngi la poi ha ka kordit, sohsat, jingduh jingkyrmen bad ka jinglutksan. Ka sorkar kam i don lad ban leh eiei halor kane wat la ka la dep kular sha ki paidbah ha ka por ilekshon ba kan ai ïa kata ka jingsynshar kaba bha tam. Lada tang ïa ka bording ruh ym lah ban leh eiei, ngin khmih lynti kumno sa ïa kiwei pat ki kam?
Ka jingpynlip bording kaba neh da ki kynta ha ka shi sngi ka la ktah jur – naduh kiba don ba em haduh ki duk ki suk, naduh ki samla pule haduh ki kmie ki kpa, naduh ki nongseng kam seng jam haduh ki jaka trei jaka ktah. Ngi tip ba ha kane ka juk, ki kor kiba ngi pyndonkam ki hap ban shaniah ha ka bording lym kumta kim treikam haei-haei ruh. Ka jingpynlip bording ka la pynsuki lut ïa ki kam ki jam baroh khamtam jong kito kiba don ha ki kam shimet bad ki bym lah ban shaniah ha ka sorkar ba kan bsa ïa ki. Ngi lah ban pynkynmaw hangne ba ka la don ka jingjia ba katba u nongbishar ka Meghalaya High Court u dang ai hukum ha kaba ïadei bad kawei ka mukotduma halor ka jingpynlip bording ba khah-khah, ka la don ka jingthut ba hapdeng khyndiat por ha ka bording bad kane ka la pynlong ïa u nongbishar ban kdew ba ka lah ban dei ka dak ka shin ba ka sorkar jylla kan hap ban ai ïa ka jubab ba pura halor ka jingthut ka bording.
Ka High Court ha kato ka por ka la ong ba ka dei ka kamram jong ka sorkar jylla ban pyntikna ba ka bording ka don katkum ka jingdawa bad dei ban pynkhreh ïa ki saiñdur khnang ba yn lah ban pyndap ïa ka jingdonkam bording hadien habud. Ka la ong ruh ba ka sorkar ka lah ban thied bording na ka ‘Open Grid’ bad ban poi sha ka jingïasngewthuh jingmut bad ki kompani pynmih bording ban pyntikna ba ka bording kan don na ka bynta ki paidbah lada ki paidbah ki kloi ban siew. Shuh shuh ka ïingbishar ka la kdew ba ha ki jingthoh, dei ban pyni ba ki kynta pynlip bording ki dei ban long mar katjuh bad kiei ki jingpynkhreh ban pynbiang bording na ka bynta ki shlem kiba donkam kum ki Hospital, Airport bad kiwei. Ngim tip kumno ka sorkar bad ka MeECL kin jubab sha ka High Court ynda la dei biang ka sngi ban bishar ïa ka mukotduma halor ka jingpynlip bording kaba da ki kynta ha ka shi sngi.
Ma ngi ki paidbah ngi long kiba jemnud palat. Katne ngi hap ban shah ïa ki jingeh, hynrei ngi sngap beit bad ngi leh kum bym don jingktah eiei na ka jingpynlip bording. Phin hap ban ïa peit bha ïa kita ki ‘bill’ kiba phin ïoh ha kine ki sngi bad lada phi shem ba ka bai thang ding ilektrik ka long shaba palat bad kam ïahap eiei namar ka jingdon ka jingpynlip bording, phi dei ban ïa pyntip khnang ba kiwei ruh kin ïa long kiba husiar. Ngim dei ban ailad ïa ka MeECL ba kan shu kjit na ki thied snam jong ngi lada kam lah ban pynbiang bording. Ka bai thang ding ilektrik ka dei ban ïahap bad kaei kaba ngi pyndonkam.
