Paris, Jymmang:
Ka France ha ka Lah Sngi U Blei, ka la pynbna ba kan phah biang sa kumba 12 tylli ki tup rit bad ki kali thma sha Ukraine kum shi bynta ban ai jingkyrshan bad ban pynkhlaiñ ia ka tnat shipai ka Ukraine hapdeng ka jingiakhun pyrshah ia ki shipai ka Russia.
Ha kane ka kynti, la ong ba u President ka France u Emmanuel Macron bad u President ka Ukraine u Volodymyr Zelensky, ki la pynbna ia ki jingpynngat kyndon thymmai pyrshah ia ka Russia namar ka jingleit hiar thma ba khlem sangeh pyrshah ia ka Ukraine.
Kumta la ong ba ha kine ki taiew ki ban wan, ka France kan ai jinghikai bad kan phah ia katto katne ki shipai jongka ha ryngkat bad ki kali thma bad ki tup thma kynthup ia ki AMX-10RC.
Namar la ong ba ka France kan ialeh katba lah ban ai jingkyrshan ia ka Ukraine da ki tiar iakhun na suiñ kum shi bynta ban lah ban ialeh pyrshah ia ki kam thombor ba jur bad ba khlaiñ bor jong ka Russia.
Namar kata, la ong ruh ba ka Ukraine bad ka France ki la dep iamynjur ban iasnoh kti lang na ka bynta ban pynngat kyndon ia ka Russia haba iadei bad ka jingleh dusmon jong katei ka ri ia ka Ukraine da katei ka thma.
Katei ka jingpynbna ka long hadien ba u Zelensky u la leit poi sha France ha ka janmiet Sngi U Blei bad u la leit ban iabam ja miet lang bad u Macron ha Elysee Palace.
U President ka Urkaine, u Zelensky ha katei hi ka Sngi U Blei, u la ong ba lada ki ri na West kin iasnoh kti lang ban ai jingkyrshan radbah ia ka Ukraine hapdeng ka jingiakhun thma bad jingialeh pyrshah ia ka Russia ha une u snem, ka Russia kan ym shan slem bad khlem pep kan sa khyllem bad shah rem ha ka Ukraine hapoh jong une hi u snem. Namar kata, u Zelensky u la kyntu ia ki ri ka thaiñ West baroh kawei ba kin iatylli lang ban ai jingkyrshan ia ka Ukraine khnang ba ka Ukraine kan ioh ban knieh biang noh ruh ia baroh ki bynta kiba la shah kam trai da ka Russia naduh ba sdang ka thma. Namar u la ong ruh ba ka Ukraine kan ym pyndem bad kan ym treh iasuk katba kam pat ioh biang ia kitei ki bynta kiba dei hok ki jong ka.
