Shillong, Jymmang 15:
Hadien lai snem ba la seng ïa ka shlem ai jinghikai phutbol, ka OM Roy Memorial Higher School ka la ïoh jaka ïalehkai na ka bynta ban tei ïa ka madan phutbol. Ka jingthmu halor kane ka long ban saiñdur ïa ki khynnah kiba don ïa ka sap ïalehkai phutbol.
“Ïa katei ka jaka kaba don ha Mawtawar ka dei kaba ngi la thied na ka bynta ban ai jinghikai phutbol ïa ki khynnah kiba don ïa ka sap ïalehkai ba kyrpang nalor ka pule puthi,” la pynpaw ka Principal, Kong A. Syiemlieh ha ka Lah Sngi U Blei.
Kumba ka paw naduh ba la seng ïa katei ka skul, ki la mih shibun ki khynnah kiba la lah ba pynpaw ïa ki sap ïalehkai ba kyrpang bad kiba la wanrah nam bad burom ïa ka jylla ha ki jingïalehkai papher bapher.
Hadien ba ka la rah ïa ka nam lahduh ha ki lympung ïalehkai hapoh ka Jylla ba la pynlong da ka tnat ïalehkai, ka OM Roy ha u 2013 ka la rah ruh shisien ïa ka nam lahduh ha ka International Subroto Mukherjee Football Cup ha ka nongbah Delhi.
Kumta ha u 2020 ka OM Roy ka la plie ïa ka shlem ai jinghikai phutbol (Football Academy) na ka bynta ban saiñdur ïa ki khynnah, hynrei na ka daw ba wan lynshop ka khlam Covid-19 ka la long ka jingkhanglad shipor ïa kane ka skul. Dangshen mynta u snem pat ka la ïoh ruh ban thied ïa ka jaka ha Mawtawar na ka bynta ban tei ïa ka madan ïalehkai phutbol khnang ba kan long ka jingmyntoi ïa ki khynnah ba kin pyntbit ïalade ha ka kam ïalehkai phutbol nalor ka pule puthi.
Kumta kane ka skul ha ka Lah Sngi U Blei jong mynta ka taïew ka la aiti ïa ka dorkhas ha u Assistant Director ka tnat ïalehkai, Bah K. Passah ha ka jingïadon lang u District Sports Officer ka East Khasi Hills, Bah O. Mawthoh ban ïarap pynïoh ïa ki lad jingïarap khnang ban lah pynbit pynbiang ïa katei ka madan.
Na ka liang u Bah Passah u la ong ba halor kane ka bynta un sa rah ïa kane ban pynsngew sha ka Director ka tnat ïalehkai halor ki jingdonkam ïa ki lad jingïarap jong kane ka skul ha ki kam ïalehkai.
