Shillong, Jymmang 16:
Ka tnat pulit ka Jylla ka dang ap ban ïoh shimti ïa ki shipai BSF kiba la shah kem halor ka jingdonkti ban siat ïap ïa u nongñiah trok ha ka jingjia kaba la jia dang shen hajan ka shnong Mawshun sharum Pynursla, East Khasi Hills district.
U Director General of Police (DGP) u Dr L.R Bishnoi u la ong ba kane ka jingjia ka dang ïaid hi ka jingtohkit, bad ka dang don ruh ha Ïingbishar.
Nangta, u la ong ba ha ka jingïakynduh bad u Symbud Myntri Rangbah u Bah Prestone Tynsong uba peit ïa ka tnat pulit ha Secretariat, la donlang ruh ki ophisar na ka liang ka BSF ha kaba la ïakren ïa kane ka bynta naduh ki kyndon aiñ jong ki shipai BSF, ka bynta jong ka Ïingbishar, bad kiwei kiwei ki kyndon.
U DGP u la ong ba na ka liang ki shipai BSF ki la kular ban leh katkum ka aiñ, hynrei ha kajuh ka por, ka tnat pulit ka Jylla ruh ka la ïai ban, ba ki dei aiti sha ki pulit ka Jylla ïa kita ki shipai BSF, hynrei ka aiñ ruh ka don na ka bynta kiba dei ki nongtrei ka Sorkar Pdeng.
U la ong ba haduh mynta, ki don lai ngut ki shipai BSF kiba shah kem.
Ka jingshah siat ïap u nongñiah trok u Bah Roning Nongkynrih ka la jia ha ka miet 5 tarik Jymmang ha ka por 11 baje eiei mynmiet ha ki shipai BSF ha kaba la kynnoh ba kata ka trok ka dei kaba kit masi.
Ha kawei pat ka liang, u DGP u la ong ba ka tnat pulit ka dang pynkhreh ban phah da ka kot jingpynshisha (affidavit) sha Ïingbishar halor ka jingong ka Ïingbishar ban tehlakam ïa ka jingtih bad shalan dewïong beaiñ.
