Shillong, Jymmang 16:
Kum shi bynta ban bteng biang ïa ka jingïakren ïasuk bad ka Sorkar Jylla bad kumjuh ka Sorkar Pdeng, ki nongïalam jong ka kynhun kieng atiar ka Hynñiewtrep National Liberation Council (HNLC) ki la wan poi sha Shillong.
Ha kane ka jingwan kiew sha Shillong, la ïohi ba na ka liang jong kine ki nongïalam ka HNLC ki la ïashon dur lang ruh bad u ksiang ka kynhun uba lam khmat ban pynpoi sha ka miej jong ka jingïakren ïasuk, Bah Sadon Blah ha ka Sngi Ba-ar ha Nehru Park, Umïam.
Wat la kine ki nongïalam ka HNLC ki la wan poi sha Shillong, hynrei, kam shym la don satia kano kano ka jingpyllait khubor la ka dei na u Bah Sadon Blah ne na ki bor Sorkar.
Lah ban pynkynmaw ba ka sien ba nyngkong ba ki san ngut ki nongïalam ka HNLC ki la wan poi sha Shillong ka dei ha ka 5 tarik Nailar, 2022. Hadien ka jingpynïaid shakhmat ïa ka jingïakren ïasuk, ki la leit phai noh sha Bangladesh ha ka 16 tarik Nailur, 2022.
Kine san ngut ki nongïalam ka HNLC ki long u Vice Chairman, Bah Manbhalang Jyrwa, Publicity Secretary, Bah Aristerwell Thongni, Foreign Secretary, Bah Phrangkupar Diengdoh lem bad ar ngut ki PSO, kita u Bah Aiborlem Marbaniang bad u Bah Storgy Lyngdoh.
Ka jingwan kiew jong ki nongïalam ka HNLC sha Shillong ka long hadien ka jingïoh ïa ka lynti ïaid kaba shngaiñ na ka Sorkar Jylla.
Katkum ka khubor ba ïoh lum, kine ki nongïalam ka HNLC ki la leit ruh ban ïakynduh ïa u Myntri ka tnat Kam Pohïing ka jylla, Bah Prestone Tynsong.
