Shillong, Jymmang 16:
U President ba rangbah ka Voice of the People Party (VPP), Bah Ardent Miller Basaïawmoit u la pynshai ba ka jingïashon dur lang jong u bad u samla Amazing Kurbah ka long kum shi ïing shi sem bad kam don kano-kano ka jingleh politik haba ïadei bad katei ka bynta.
“Kato ka dei tang ka jingïashon dur…u Amazing u dei u bahaïing bad uba nga ithuh bad haba ngi ïakynduh, ngi ju ïashon dur,” la ong u Bah Basaïawmoit haba kren sha ki lad pathai khubor ha ka Sngi Ba-ar.
U la pynshai ruh ba ki don bun bah kiba ïashon dur bad u, kumjuh kito kiba kwah tiket na kano-kano ka konstitwensi, hynrei kam mut pat ba tang ba la shon dur bad u ‘Bah Ardent’, la ïoh tiket beit na ka seng.
“Ka jingïashon dur jong nga bad u Amazing ka dei kum shi ïing, shi paralok bad nga ïashon dur bad ki para jong u ruh, baroh shipara. Kam don politik eiei hangta,” pynshai u Bah Basaïawmoit.
Haba kdew ba ka VPP ïa mynta kam pat don dkhot hapoh Sohïong, u President u la ong ba kumba ka seng ka la leit ban pynrung kyrteng ha kylleng ki jaka, ka Sohïong ruh kan dei kawei ka konstitwensi kaba ka seng kan ïaid shakhmat bad katei ka kam.
“Phin sa shai hangta ynda ngi la ïaid shakhmat bad kata ka jingpynrung kyrteng, phin sa ïohi kiei kita ki ban rung bad ngi,” u la ong.
Ha kawei ka liang, haba kren bad u samla Amazing Kurbah halor katei ka bynta, u la ong ba katei ka dei ka khubor thok bad na ka liang jong u dang shen u la kren na bynta ka UDP, bad pynjop ruh ïa u Bah Synshar Kupar Roy Lyngdoh Thabah bad kumta kam lah ban long ba mynta-mynta un shu leit noh sha ka VPP.
Haba pynshai, u la ong, “Ka dur kaba saphriang mynnin ka dei ba i Bah Ardent i wan na sha Mawthadraishan bad mar syn poi ha Sohïong, i ‘phone’ ïa nga…i ong phi don hangno bad nga ong ba nga don ha Rangshken, i ong ba nga shu ïaid lynti na shnong jong phi bad nga shu kwah ban ai khublei ïa phi.”
U la ïathuh ruh ba ynda u Bah Basaïawmoit u la wan, u la khot ban ïa dih sha, bad ynda la dep, utei u nongïalam u la ong ban ïashon dur ban sah jingkynmaw ïa kaba ma u (Amazing), u la mynjur.
Haba pynsngew ba um shym la poi pyrkhat ba katei ka dur kan saphriang khubor ba un pynïasoh noh sha ka VPP, u samla Kurbah u la ong ba u la ïajan bad u Bah Basaïawmoit naduh ki por 2018 (ha ki por ba u dang dei u President ka HSPDP), nalor ka jingïadei shi kur shi jait bad utei u nongïalam ka VPP.
“Hynrei ban ong ba ngan kyrshan ne pynïasoh bad ka VPP, kam dei. Ngi dei ki briew kiba kren da kaba shai, lada ngi dei ban rung sha kano-kano ka seng, da kaba shai bad ym ban shu leh kulmar,” u la ong.
Shuh shuh u la bynrap, “Da dei ha kano-kano ka por ba ngi hap pynïasoh ne phet na kano-kano ka seng, ngin hap pynshai paidbah.”
“Kato ka dur ba shon mynnin ka dei kaba la shon ha ïing i Nah-nah jong ngi, shu ïashon sngewtynnad, hynrei ngam shym la poi pyrkhat ba kan saphriang haduh katto,” u la ong.
Kum ban shu kdew hangne, ka dur kaba la saphriang ha ka Lah Sngi U Blei ba la shon lang u President ka Voice of the People Party (VPP), u Bah Ardent Miller Basaïawmoit bad u nongkren ilekshon uba la paw ha Sohïong konstitwensi, u Bah Amazing Kurbah, ka la pynsuba ba u samla Amazing u lah ban leit pynïasoh noh bad ka VPP.
