Buhrieh u nong Tripura 51 kilo u kynja ha kali, ïoh bat ki pulit

Hadien ba la pynlong ïa ka jingkhynra ïa kane ka kali, la shem ba u nongñiah u la buhrieh 51 kilo u kynja ha kali.

Shillong, Jymmang 16:

Ki pulit ka East Jaiñtia Hills ha ka janmiet jong ka Sngi Ba-Ar ki la ïoh kem ïa uwei u briew uba na South Tripura bad ki la ïoh ban kurup 51 kilo u kynja na ka kali kaba u la pyndonkam.

U Additional SP ka East Jaiñtia Hills, u Bah Banraplang Jyrwa, u la pyntip ba ha ka por kumba 6 baje janmiet, kawei ka kali kaba don ïa u nombor AS-01S-4669 kaba la wan na Silchar, Assam ban leit sha thaiñ Khliehriat, ka la shah pynsangeh ha Damcherra, Umkiang. 

Hadien ba la pynlong ïa ka jingkhynra ïa kane ka kali, la shem ba u nongñiah u la buhrieh 51 kilo u kynja ha kali. Ki pulit ki la pynlong ïa ka jingpeit bniah ha ryngkat ka jingdon lang ki sakhi bad la lah ban pyntikna ba u mar uba u la buhrieh ha kali u dei u kynja.

Na ka liang ki pulit ki la kem noh ïa utei u nongñiah ïa uba la tip kyrteng kum u Ershad Miah uba na Uttar Para ICDS Centre Para Khupilong, South Tripura.

Ki pulit ki la pynrung da ka jingujor ha thanat Lumshnong hapoh ki kyndon jong ka NDPS Act bad ka jingtohkit ka dang ïaid.