France, Jymmang:
Katkum ka khubor ba lah ioh lum ka iathuh ba na ka liang jong uwei na ki khlur ialehkai phutbol jong ka klob Nantes u Mostafa Mohamed, u lah shah dain kuna hadien ba u lah kyntait na ka bynta ban ialehkai ha kawei na ki jingiakhun kum ka dak jingpyrshah ha kaba iadei bad ka Anti-Homophobia Campaign ha ka lympung ialehkai ba paw jong ka ri France ka Ligue 1.
Nangta ruh na ka liang jong katei ka klob ka iathuh ba ia u Mohamed lah pynshitom da katei ka kyndon da kaba dain kuna ia u halor ka jingkyntait ban iakhun pyrshah ia ka klob Toulouse na ki daw shimet. Kane ka wan jia ruh ha ka por ba ka klob ialehkai ka jong u ka dang iakhun na ka bynta ban lait na ka jingshah pynhiar kyrdan noh na katei ka lympung ialehkai. Kumta ruh katei ka klob ka bynrap ruh ba ia ka pisa ba lah dain kuna na u yn sa synniang ruh sha kata ka shlem kaba ju iai ai ia ka jingkyrshan ka jong ka sha ki dkhot jong ka LGBTQ Community kiba ngat ha ka jingshah banbein halor ka hok ka jong ki.
Kumjuh ruh ka jingbun jong ki jainphong ialehkai jong baroh ki nongialehkai ha katei ka klob ialehkai kaba na France kaba wan ba nyngkong ha ka 2nd Div bad kumjuh ruh ki jingdeng-kti ba ju phong da ki kapten bad ki nongpyniaid ki don ia hynniew tylli ki ri (Rainbow Coloured) naba katei ka lympung ialehkai ka pynlong mynta ia ki jingialehkai kum ka jingiakhun ka jong ka ha kaba iadei bad ka Homophobia. Kumta ruh kita ki jainphong ialehkai kiba don hynniew rong yn sa die lilam noh ha ryngkat bad ka song pisa ba ioh kan leit sha ki lai tylli ki shlem kiba dang iai treikam haduh mynta ha ka jingiakhun jong ki ia ka LGBTQ.
Ka khubor ka iathuh ruh ba utei u nongalehkai na Egypt u lah kyntait ha ka ban shimbynta ha ka jingialehkai kaba ka kynhun jong u ka lah shah pynkut noh da ka jingbym shym la lah ban ia thep kol eiei (0-0) ha Toulouse, watla katei ka klob ka donkam bha ban khur dor-thong naba ka dang iai wad ki lad ki lynti ban kiew sha ki jaka ba kham shajrong bad ban lait na ka jingshah weng noh na ka lympung. Ka rai jong katei ka klob ialehkai na ka bynta ban dain kuna ia u ha ka jaka ban sospon ialehkai, ka long ban pynthikna ruh ba ka klob baroh kawei kan ym iuhroit ia ka hok jong u kum u nongialehkai ba paw jong ka uba lah khur ia ki 11 kol shalade ha ka aiom ialehkai ba mynta naba ka kynhun ka shong mynta da 1 dor-thong ban lait na u lain ka jingma ha ryngkat bad ki lai tylli ki jingialehkai ba dangsah mynta ka aiom. Ym tang u Mohamed, hynrei bun na kiwei pat ki nongialehkai ki lah kyntait ban shimbynta ha ka Campaig bad kumta ki lah duh noh ia ki katto katne ki jingialehkai ka kynhun jong ki bad kita ki kynthup ia u Wing ka Toulouse u Zakaria Aboukhlal.
