Shillong, Jymmang 16:
U Director General of Police (DGP) ka Jylla, u Dr Lajja Ram Bishnoi u la ong ba ka tnat pulit ka dang pan kaiphod na ki district ban pyntikna halor ka jingtip kaba ai ksai ba ka don ka jingpyrshang ban pynkhie rasong biang ïa ka kynhun kieng atiar, kata ka Garo National Liberation Army (GNLA).
Haba ki nongthoh khubor ki la buh jingkylli halor kane ha ka Sngi Ba-ar, u Dr Bishnoi u la ong ba ki jingtip kiba ka tnat pulit ka ïoh ksai ki sah tang kum ki jingtip bad ïa kita dang hap ban pyntikna.
Kumta u la ong ba dei halor kane ba la phah jingthoh sha ki district ban pan kaiphod kum ka jingpyntikna, bad hadien kata, na ka liang jong u un sa lah ban ong eiei.
Haba kylli halor kata ka jingtip kaba paw ba ki don kumba 500 dkhot kiba la leit shah hikai, u la ong kane ka dei ka jingtip ba ïoh lum na ki tyllong khubor, bad ïa kane yn dang hap hi ban pyntikna.
Dang shen ka la lait tuh ka jingbatai jong ka tnat pulit halor ka jingïoh jingtip jong ka ba ka don ka jingthmu ban pynkhie rasong biang ïa ka GNLA.
Ka GNLA ka dei ka kynhun kieng atiar na Rilum Garo kaba khlaiñ ha kine ki khyndiat snem, hynrei ka la troiñ noh hadien ka jingshah kem u Champion R Sangma, uba long u nongïalam barim jong kane ka kynhun lehnoh, bad ka jingïap noh u Sohan D Shira uba long u Commander-in-Chief, ha ka jingïather kuli bad ki pulit ha ka 24 tarik, Rymphang, 2018.
