Shillong, Jymmang 16:
Ka Shillong Lajong FC ka la mad ïa ka jingshah rem kaba nyngkong ha ka wat kaba khatduh jong ka lympung ïalehkai Second Division League, hadien ba shah pynliem noh ha ka Ambernath United haduh 5-1 kol ha ka Sngi Ba-ar ha Mumbai.
Kane ka jingshah rem ka la pynlong ïa ka Shillong Lajong FC ban hiar sha ka kyrdan balai, katba ka Ambernath ka la kiew sha ka kyrdan ba hakhlieh hadien ba ka la tam da 2 dor-thong ïa ka Delhi FC bad ka SLFC.
Ha kawei pat ka jingïakhun ha Kolkata, ka Delhi FC ka la jam sha ka kyrdan ba-ar hadien ba lah pynliem noh ïa ka United SC da 3-2 kol.
Wat la ka Shillong Lajong FC ka la lah ban pynliem ïa ka United ha la ïing bad ïasam mar 1 dor-thong (point) bad ka Delhi FC ha Chandigarh, hynrei ha kane ka jingïakhun kam shym la lah ban ïalehkai bha.
Ha kane ka jingïakhun, u coach ka Shillong Lajong FC, Bah Bobby Lyngdoh Nongbet, u la pynmih thymmai ïa ar ngut ki rangïalehkai, u Sambor Kharsahnoh bad u Babysunday Marngar ha ka jaka u Ronney Wilson Kharbudon bad u Figo Syndai.
Ka Ambernath ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Arif Shaikh ha ka minit kaba 22. Wat la ka Shillong Lajong FC ka la pyrshah ban pynphai, hynrei kam shym la lah ban pynurlong bad ha shwa ban kut ka jingïalehkai jong ka kylla step ka la shah thep biang sa shi kol lyngba u Adil Khan ha ka minit kaba 44.
Hadien ba la bteng biang ïa ka jingïakhun jong ka kylla miet, u Figo u la ïoh ban mih madan ha ka jaka u Babysunday, hynrei kane ka shym la lah ban pynurlong ïa ka Shillong Lajong FC namar ka la shah thep kol biang lyngba u Shravan Shetty ha ka minit kaba 56.
Hadien katto katne por ka Shillong Lajong FC ka la lah ban pynurlong ban pynphai kylla shi kol lyngba u Hardy Cliff Nongbri ha ka minit kaba 67.
Ha shwa ban kut artad ka jingïalehkai, ki rangïalehkai ka Ambernath ki la ïakhun tyngeh bad ka la ïoh ban thep biang sa ar kol lynga u Johnson Joseph Mathews ha ka minit kaba 87 bad kawei pat da u Himanshu Patil (88) na ka bynta ban khur syndon ïa ka jingjop.
Lyngba kane ka jingshah rem ka Shillong Lajong FC ka dangsah sa kawei ka jingïalehkai kaba khatduh ha la ïing pyrshah ïa ka FC Bengaluru United ha ka 21 tarik mynta u bnai. Kane ka kynhun ïalehkai na ka nongbah ka donkam ban ïakhun tyngeh na ka bynta ban khur ïa ka jingjop namar dei tang ar tylli ki kynhun ki ban ïoh rung sha ka I-League.
