
Shillong, Jymmang 16:
U MLA ka Nongkrem bad nongïalam ba rangbah ka Voice of the People Party (VPP), Bah Ardent Miller Basaïawmoit u la ong ba ka jingkynnoh pyrshah ïa u halor ka jing-ot kilo ïa ki mar rep ka long kaba sngew biria bad thamula.
“Sngew thamula, sngew biria kum ki ’riew rangbah, nga ïohi ba ki khyllie ïa ka snem 2014 ha ka por ba nga long kum u Chief Executive Member (CEM) ka KHADC. Jyn da ki la bud beit ïa kato ka jingpynbeit ba ki la ïathuh ha ki lad pathai khubor mynnin, nga tharai kan ym mih kata ka jingud-jingkhñium jong ki nongrep ba ka don kata ka jing-ot kilo,” la ong u Bah Basaïawmoit haba kren sha ki lad pathai khubor ha ka Sngi Ba-ar.
Nangta u la pynkynmaw ba ha ka por ba long CEM, ka la don ka jingïakynduh hapdeng ki nongrep bad ki nongkhaïi ha Ïewduh ha kaba da kawei ka sur la rai ba kan don ka jingpynbeit thymmai kaba ka KHADC kan buh jingthoh.
“Kato ka dei ka jingpynbeit ryntih ïa ka jingdonkam ban ïa peit katno kilo, haba ong ka jing-ot…ka mut ka jing-ot laki-laka na ka liang ki nongkhaïi ïa ki mar-rep…10, 15, ne 20 kilo hateng-hateng. Ka mih ka jingud bad haba mih ka jingud, ngi leit sha Ïewduh ban pynbeit bad kato ka dei ka rai kaba la ïa mynjur da ki nongrep bad ki nongkhaïi,” u la ong.
Ha kajuh ka por u la pynshai ïa katei ha ki nongrep kam dei ka jing-ot hynrei ka dei ka jingïapynbeit namar ka don ka jingduna thew ne ka jingïasngewthuh jingmut.
“Lada ka KHADC lyngba ka EC ba mynta hapoh ka jingïalam u Bah Titostarwell Chyne ki bud ïa kaba ki khyllie mynta ban kynnoh ïa nga, kan ym mih ka jingkhñium ka jingud. Ka jingleit hiar biang jong ki sha Ïewduh ka pynpaw ba ka don kata ka jing-ot kilo laki-laka, ka jingban beiñ ïa ki nongrep,” la ong u CEM barim ka KHADC.
Haba kdew ba haba leh ïa kano-kano ka kam da kaba shu pyrkhat beit na bynta ka ilekshon ne saiñ pyrthei kam long kaba dei, utei u nongmihkhmat u la ong, “Leit ban kylli na ki nongkhaïi bad ki nongrep, kin ïathuh jia aïu ha ka por ba u Bah Ardent u long CEM.”
Shuh shuh u la bynrap, “Ka long ne em ka jingkyrkhu, ban shu kynnoh nabar ban shu kynthoh ba kata ka jing-ot kilo ka sdang ha ka por u Bah Ardent, haba ngi pynbeit ryntih ïa kiei-kiei, ka long kaei-kaei kaba sngew biria sngew thamula. Lehse kam pyni ïa kata ka jinglong rangbah ha ka jinglong nongïalam.”