New Delhi, Jymmang:
Katkum ki khubor la ong ba 6 ngut ki briew ki la khlad noh hadien ka jingkem ding jong ka ïing mala ‘Hostel’ kaba don hapoh Wellington jong ka New Zealand ha ka Sngi Ba-ar. Nangta ki bor pyn-iaid ki la iathuh ruh ba ka jingkhlad ki briew ka lah ban nang kiew hadien ynda la ioh ban lum jingkheiñ thik pa thik.
Namar, la ong ba ki don bun ngut kiwei ruh kiba ki bor pyniaid kim shym lah shuh ban ai jingkheiñ pura bads namarkata ym pat lah ban pyntikna ia ka jingdon kiba khlad nalor jong kitei ki 6 ngut kiba la dep pyntip hashwa.
U Myntri Rangbahduh ka New Zealand, u Chris Hipkins haba iakren bad ki lad pathai khubor u la ong ba 6 ngut ki briew ki la khlad noh ha katei ka jingkem ding katei ka hostel, hynrei na ka liang ki pulit ki la pyntip ba ka jingkhlad ki briew ka lah ban nang kiew sa kumba katto katne ngut.
Ki pulit ki la ioh ban pyllait im noh ia 52 ngut napdeng jong baroh kiba don hapoh jong katei ka hostel ha katei ka sngi.
La ong ba katei ka ding ka la pluh na ka bynta ba shajrong duh jong katei ka ïingmala kaba don hapoh Wellington, markhap bad ka Newtown bad kane ka la jia ha ka kylla step jong ka Sngi Ba-ar.
Hynrei ki bor pyniaid ki la iathuh ba ia ka daw jong katei ka jingpluh, ym pat lah satia ban tip tikna bad kumta ki pulit ki dang wad bniah bad tohkit ia kito kiba sahwai sha ka bynta ba sha jrong duh jong katei ka hostel.
