Shillong, Jymmang 16:
Ka Kynhun Myntri jong ka Sorkar Jylla hapoh ka jingïalam ka kynhun MDA-II kan ïakynduh ha ka Sngi Balang ban ïathir halor ka Roster System kaba la hukum ban pyntreikam da ka Ïingbishar.
Ka Kynhun Myntri kan sa ïakynduh ha ka por 3 baje janmiet bad ha kane ka jingïalang kan don ka jingbatai bniah (presentation) haba ïadei bad ka Roster System.
Ka Kynhun Myntri ka lah ban kham shimpor ban ïatai ïa kane ka mat, ha kaba ka Sorkar Jylla ka hap ruh ban ïathuh sha ka Ïingbishar ïa ka rai jong ka haba ïadei bad kane.
La ïathuh ba ka jingïatai halor kane ka mat kan bteng ha baroh ki sngi jong kane ka taïew ha kaba yn bud sa ka jingïalang jong ki MLA ka Meghalaya Democratic Alliance (MDA-II). Hadien kane, kan bud sa ka jingïakynduh bad baroh ki seng saiñ pyrthei.
Kum ban pynkynmaw, ka Meghalaya High Court lyngba ki ar ngut ki nongbishar, u Chief Justice Sanjib Banerjee bad u Justice Wanlura Diengdoh ka la pynmih ïa ka jingbthah ha ka 5 tarik Ïaïong, 2022 ha kaba ka la bthah ban pynsangeh shwa ïa baroh ki jingpynrung kam halor ka nongrim ba ha ka por ba khot ban thep kam, ki tnat Sorkar bad kiwei kiwei ki shnat treikam kiba hap ban bud ïa ka bhah thungkam ne ‘Reservation Policy,’ ki khlem pyni satia ïa ka ‘Roster System’ lane kim pyni shai ïa ka rukom mang ne rukom kheiñ ïa ki kam na ka bynta ki jaitbynriew bapher bapher katkum ka ‘Reservation Policy’ lane ka jingbhah lypa ïa ki kam katkum ka ‘Reservation Policy’ ha ka por ba khot ban thep kam.
Ka jingpynsangeh ban thungkam ha ki tnat treikam ka Sorkar ka la ktah ïa ka rukom treikam ka Sorkar bad ka ktah ruh ïa ki phew hajar ngut ki nongwad kam Sorkar khamtam eh kiba la kut artad ka rta ban thep kam.
Lada ka Sorkar ka dang pynsangeh shuh shuh ïa ka jingthungkam tad haduh ban da pynbeit biang ïa ka Reservation Policy, kan nang jur shuh shuh ka jingshah ktah ïa ki samla kiba wad kam khamtam eh kiba la kut artad ka rta ban wad kam Sorkar.
