Shillong, Jymmang 16:
Ar ngut ki suba nongkhaïi drok ha ka Sngi Ba-ar ki la ngat ha ka shrip jong ki pulit ka Anti Narcotic Task Force (ANTF) na Khliehriat ha East Jaiñtia Hills district.
Ka jingïoh kem ïa kitei ar ngut ka la long hadien ka jingïoh ïa ka jingtip kaba bniah ha kaba ki pulit ka ANTF bad ki pulit ka thanat Khliehriat ki la pynlong ka jingpynap shrip ha surokbah NH 06 ha kaba ki la ïoh ban bat noh ïa kawei ka bos kaba don ïa u nombor AS01-LC-7641.
Ha ka jingkynra ïa kane ka bos, ki pulit ki la ïoh kem ïa kawei ka longkmie ba kyrteng ka Lhingneivah Singson (35 snem) lem bad u kurim u Lalroho Hmar (38 snem).
Na kine ar ngut ki pulit ki la ïoh kurup 6 tylli ki synduk sabon ba don kynja drok rong soh bad ïa kine 2 ngut la pynngat hapoh ka kyndon NDPS Act, bad la pynrung case hapoh ka thanat Khliehriat na ka bynta ban pynlong ka jingtohkit.
U SP ka East Jaiñtia Hills, u Jagpal Singh Dhanoa, u la ïathuh ba hadien ka jingtohkit la lap ba u dei u drok heroin ba don 65.92 gram bad na kine 2 ngut la ïoh ruh ban kurup ïa ka pisa kaba kot T.5,000.
