Poi u sohmrit na South West Garo Hills sha Mumbai

Kane kan dei ka sien banyngkong ba la lah ban phah ïa ki mar rep na katei ka distrik shabar.

Ampati, Jymmang 16:

Ki nongrep hapoh ka kynhun Dimiligre IVCS Ltd. ha South West Garo Hills ki la phah kumba 11 ton u sohmrit khlaw sha sorbah Mumbai ha ka Sngi Ba-ar.

Kane kan dei ka sien banyngkong ba la lah ban phah ïa ki mar rep na katei ka distrik shabar. Ha kane ka sngi, u BDO ka Zikzak Block, u Dr. Digonto Hajong, u la leit ban plie ïa ki trok kiba la kit ïa u sohmrit.

Ha kane ka sngi, la kit 200 song u sohmrit bad ka dor ban die ka long T. 450 shi kilo. Ïa une u sohmrit la thied da ka Sundardas Rathansey Spices Pvt. Ltd. kaba don ha Mumbai. Na ka liang u Managing Director jong kane ka kompani, u Dharamsey Pallicha, u la ong ba katei ka thaiñ ka long kaba seisoh bha ha ka liang ki mar rep tangba ki nongrep ki dei ban ïoh jingkyrshan ha ka dur jong ka ram na ki Bank.

U Pallicha u la ong ba u sohmrit khlaw ba la thung ha katei ka thaiñ u long uba bha shibun, hynrei ki nongrep ki donkam pat ïa ki nongthied kiba tikna khnang ba kin lah dor bha.

Ha kajuh ka por, u la pynpaw ïa ka jingsngew bynñiaw ba u khlem lah ban thied kham bun u sohmrit namar don napdeng ki nongrep kiba la dep ban die sha kiwei pat ki briew kiba na kiwei pat ki jylla ha ka dor kaba kham duna.

Ka Dimiligre IVCS Ltd., nalor ba ka dei ka Society kaba la pynrung kyrteng, ka dei ruh kaba la ïoh jingithuh na ka FSSAI. Katei ka jinglah die ïa u sohmrit sha Mumbai ka dei ka jingjop na ka bynta ki nongrep kiba don ha ka thaiñ Dimiligre.