Shillong, Jymmang 16:
Ka Nongthymmai SCC ka la pynkut noh ïa ka jingrakhe Platinum Jubilee ha ka Sngi Saitjaiñ ha madan Nongthymmai da kaba pynkup burom ïa ki rangïalehkai barim lem bad ki dkhot nongkitkam baroh.
Ïa kane ka klob la seng ha u snem 1944 bad la dei ban rakhe ha u 2019, hynrei na ka daw ka jingwan lynshop jong ka khlam Covid-19 ym shym la lah ban pynlong ha u snem ba bud.
Ha kane ka jingïaid lynti, ka kynhun ïalehkai kriket jong ka Nongthymmai ka la khur ïa ka nam lahduh ha ka First Division ba la pynïaid da ka Shillong Cricket Association ha u snem 2019 bad 2022. Katba ha ka jingïalehkai phutbol katei ka kynhun ka la wan ha ka kyrdan ba-ar jong ka First Division ba la pynïaid da ka Shillong Sports Association bad mynta ka aïom kan ïashim bynta ha ka Shillong Premier League.
Ha katei ka sngi la pynlong ïa kiwei pat ki prokram kiba kynthup ïa ka fete, ïakop rwai bad ka jingïakop Miss bad Mr Nongthymmai. Ha kane ka sngi la ïadon lang u MDC ka Nongthymmai, Bah Latiplang Kharkongor, u MLA barim, Bah Jemino Mawthoh bad kiwei.
Na ka liang u General Secretary, Bah J.C Cajee, u la pynpaw halor ka jingïaid lynti kane ka klob naduh ba la seng ïa ka bad ka jingïoh ïa ka madan ïalehkai ha Nongthymmai lyngba ka kur Kharkongor.
Naduh ba la sdang ïa ka Nongthymmai SCC ha u snem 1944, ka la ïoh ban ïashim bynta ha ki jingïalehkai football, hockey bad athletics ha kaba ki la mih shibun ki nongïalehkai kiba paw ha kito ki por kiba kynthup ïa u Bah Yolster Kharkongor, H. Ladia, Piswell Kharkongor bad R. Phanwar ha kaba kine baroh kim don shuh.
