Shillong, Jymmang 16:
Ka Khliehmawlieh Youth Club ka la sdang da ka jingjop ha ka lympung ïalehkai Meghalaya State League 2023, hadien ba ka lah ban pynjem khnap ïa ka Atong Matgrik FC haduh 7-1 kol ha ka Sngi Ba-ar na ka Group-D kaba la long ha madan Chandmari kaba ha Tura.
Ha kiwei pat ki jingïalehkai, ka Rangdajied United FC ka la ïakhaid mar 1-1 kol pyrshah ïa ka Ladthadlaboh SC ha Kiang Nangbah Stadium ha ka Jowai Zone (Group-B), katba ka Langsning FC ka la lah ban pynliem noh ïa ka Umkseh SC da 3-1 kol ha ka Shillong Zone (Group-A) kaba la long ha madan Third Ground, Polo.
Ha katei ka jingïakhun ka Khliehmawlieh ka la ïoh ban thep kol nyngkong lyngba u Rodyson Dkhar (14′) bad hadien kata ka la pynbud biang ïa ka kol ba ar lyngba u Sharan Sing Nonglang (20′). Hadien shiteng kynta ka Atong Matgrik ka la lah ban pynphai kylla shi kol lyngba u Rakchuwell Marak ha ka minit kaba 36. Haduh kaba kut jong ka kylla step ka Khliehmawlieh ka dang tam da 2-1 kol.
Hadien ba la bteng biang ïa ka jingïakhun jong ka kylla miet, ki rangïalehkai ka Khliehmawlieh ki la ïai bteng ban ïakhun tyngeh ha kaba ka la ïoh ban thep kol biang lyngba u Istarbon Marngar (69′). Tang hadien 2 minit kane ka kynhun ka la pynbud biang ïa ka kol ba saw lyngba u Lenny Kravity Lyngdoh (71′) bad ka kol basan lyngba u Dadap Marwein (73′). Ha shwa ban wai jong ka jingïakhun, kane ka kynhun ka la thep biang sa ar kol lyngba u Kynjai Marthong (83′) bad u Rishotbor Lyngdoh (90’+3).
Ha kaba ïadei bad ka jingïalehkai ha Jowai, ka Rangdajied ka la ïoh ban pynkhih jar nyngkong eh lyngba u Knerktilang Buam ha ka minit kaba 12. Kane ka la wan urlong na ka daw ka jingbakla uwei na ki rangïalehkai ka Ladthadlaboh bad utei u rangïalehkai um shym la pynlehnohei ïa katei ka kabu ksiar kaba u la ïoh ban shut najngai.
Wat la ka Rangdajied ka la tam da shi kol, hynrei kane ka la neh tang hapoh 20 minit naba u Ebanskhem Nongtdu u la lah ban pynphai kylla ha ka minit kaba 31 na ka bynta ban pynïakhaid mar shi kol.
Haba phai sha ka jingïakhun kaba la long ha madan MFA Shillong, u Roikhihbha Nongtdu u la ïoh ban pynkhih jar nyngkong eh na ka bynta ka Langsning ha ka minit kaba 10 pyrshah ïa ka Umkseh. Kane ka la wan urlong lyngba ka jingïoh ban rah bol da u Milancy Khongstia ban pynbuh bol ïa u Nongtdu uba khlem pynlehnohei ïa kane ka kabu ksiar.
Hadien lai minit u Khongstia u la pynbuh bol biang na ka bynta u Nongtdu sa shisien pat bad ha kane ka kynti u la lah ban thep biang sa shi kol.
Hadien katto katne por ba la bteng biang ïa ka jingïakhun jong ka kylla miet, ka Umkseh ka la lah ban pynphai kylla shi kol lyngba ka ‘free-kick’ ba la shut da u Kyrshan Khongsit ha ka minit kaba 54.
Wat la ka Langsning ka la shah pynphai kylla shi kol, hynrei ka la lah pat ban thep biang sa shi kol lyngba u Arnesius Marweiñ ha ka minit kaba 57 hadien ba u Wilbert Marbaniang uba la pyrshang ban thep kol da ka khlieh u la shah khanglad noh.
Ha ka sngi Balang kan don tang kawei ka jingïalehkai hapdeng ka Rymbai Iawpynsing SC pyrshah ïa ka Niaw Wasa United ha ka por 2:30 noh phai sngi na ka bynta ka Group-B ha Kiang Nangbah Stadium kaba ha Jowai.
