Nongpoh, Jymmang 16:
Ka kynhun jong ki trai bad nongñiah kali kamai ha Ri Bhoi lyngba ka synjuk jong ka Joint Action Committee (JAC) ka All Ri Bhoi Passengers Vehicle (ARBPV) ha ka sngi Ba-ar ki la mih shakhmat ban leit ïakynduh ïa u Deputy Commissioner ka Ri Bhoi, u Arpit Upadhyaya ban pynsngew halor ka jingeh kaba ki mad na ka jingbym siew dep ka sorkar ïa ka pisa kaba sah ka jong ki ha kaba ïadei bad ka jingleit na bynta ka kam Election MLA mynta u snem bad ruh ka kam COVID-19 ha ki snem kiba la dep.
Na ka liang ki nongïalam ka JAC ka ARBPV hapoh ka jinglamkhmat jong u Bah Bines Makri kum u Chairman bad u Bah Vincent Sohkhwai kum u General Secretary, ki la aiti ruh da ka jingthoh sha u Deputy Commissioner ka Ri Bhoi, u Arpit Updhyaya ba un shimkhia ban ïarap pyllait noh kham kloi ïa ka pisa kaba dei hok ban ïoh kumba ki la dep ban shakri.
Kum ban shu pyntip khyndiat, ka JAC jong ARBPV ka dei kaba kynthup ïa ki seng bapher bapher jong ki trai bad ki nongñiah kali kamai naduh ki taksi kamai, ki sumo, ki bos bad ruh ki pick-up trok. Ka jingmih ka jong ki mynta ka sngi ka long ban pynpaw ba kum ki trai bad nongñiah kali kamai ki shem jingeh shi kat dei ïa kane ka jingpynslem ban siew ïa ka pisa kaba ki dei hok ban ïoh.
Lah ruh ban kdew hangne ba ki bor pynïaid District ka Ri Bhoi ki la pyndonkam lane shim palat 400 tylli ki sumo, ki bos bad ki pick-up trok tang ha kane ka ilekshon MLA kaba la dep mynta u snem. Kumba la ïoh jingtip na ki trai bad nongñiah kali kamai, na ka liang ka sorkar kam shym pat lah siew dep satia ïa ka pisa kaba ki dei ban ïoh halor katei ka jingpyndonkam ïa ki kali ki jong ki bad ka la buh ïa ki hapdeng ka jingeh kaba khraw.
Na ka liang ka JAC ka ARPBV ha ka jingïalang kaba la pynlong ha kane ka sngi, ka rai ruh da kawei ka sur ban nym shim bynta shuh nangne ha kaba ïadei bad kino kino ki jingdonkam jong ka sorkar lada kam lah pynurlong ïa kitei ki jingeh ki jong ki lane ban siew dep noh ïa katei ka pisa kaba sah kaba ki dei ban ïoh.
Shuh shuh hadien ka jingkynduh bad aiti ïa ka jingthoh, ki nongïalam ka JAC ka ARPBV ki la ïathuh ba na ka liang u DC ka Ri Bhoi u la kular ban siew dep noh ïa ka pisa kaba ki dei ban ïoh na ka jingleit sha ki kam ilekshon hapoh ka 15 ne 20 sngi. Katba ha kaba ïadei pat bad ka pisa kaba ki dei ban ïoh na ka jingleit duty Covid-19, u la kular ban shimkhia ban ïaleh ban pynkloi ban pynïoh wat ïa kane ka pisa ruh.
