Montenegro, Jymmang:
Na ka liang jong ka synjuk pyniaid jingialehkai phutbol jong ka thain shathie ka ri America ka iathuh ba u Marcelo Bielsa u lah shah thung mynta kum u nongpyniaid bad nongialam jong ka kynhun ialehkai phutbol shabar ri ka Uruguay ha ka jingiateh soskular hapdeng jong ki na ka bynta ban pyntyllun ia ka kam haduh u snem ban sdang biang ka lympung ialehkai World Cup 2026.
Katei ka synjuk ka iathuh ruh ba utei u nongpyniaid ba la 67 snem ka rta, u lah shah pynmih bujli mynta ha ka jaka jong u Diego Alonso uba lah shah pynkut noh ka jingiateh kontrak hadien ba katei ka kynhun kam shym la lah ban iaid shuh shakhmat ha ka rynsan iakhun Group jong ka lympung iakhun World Cup kaba lah long ha u snem 2022 ha Qatar.
Kumta ka jingthoh ia kaba lah pyllait paidbah mynta ka pynpaw ba na ka liang jong ka Uruguayan Football Association (AUF), ka lah jied bad pynpaw mynta ia ka kyrteng jong u Marcelo Bielsa kum u nongpyniaid ba thymmai jong ka kynhun ialehkai ha ka jingiaid lynti ka jong ka sha katei ka lympung iakhun World Cup ka ban sa long ha utei u snem ha ka jingiasnohktilang jong ki lai tylli ki ri ban pynlong ia ka; kata ka Canada, USA bad Mexico.
Kan long ruh ka sien kaba nyngkong na ka bynta u Bielsa ban shimti biang ha ka kam kum u nongpyniaid naduh ba u lah iaid noh lakajong ka lynti bad ka jingpyllait san-shyieng bad ka klob Leeds United ha u bnai Rymphang 2022. U lah don ruh ha u ia kata ka samoi ha kaba u lah ioh ban pyntyllun ia ka kam ha ka kynhun ialehkai Shabar-ri ka Argentina bad Chile ha ka kam shakri jong u kum u nongpyniaid kaba lah iai jlan shaduh katto katne tylli ki snem kiba u lah pyntyllun ia kata ka shalyntem jong ka kam shakri ka jong u.
Ym tang katta, u Bielsa u lah paw ruh ha shuwa kum u kyrtong ba biang tam eh kum u nongpyniaid na ki katto katne ki klob ialehkai EPL kata ka Bournemouth bad Everton bad kumjuh ruh ka jingshah phaikhmat ka jong u na ki klob ialehkai na Brazil bad Argentina ha shuwa ba un pdiang ia katei ka kam shakri ha ka kynhun ialehkai ka Uruguay.
