Ahmedabad, Jymmang:
Katkum ka khubor ba lah ioh lum ka iathuh ba u nongtied ba tbit jong ka kynhun ialehkai Kriket ka ri u Shubman Gill, u la lah ban pynurlong mynta halade ban kynjoh sha u mawjam na ka bynta ban long tang ma u marwei ha ka khana-pateng jong ka jingialehkai Kriket ban lah kamai ia ki 100 ron tam ha ka jing-ialehkai Test, ODIs, T20I bad Indian Premier League ruh kumjuh ha ka alamanac prokram ialehkai ba shisnem kynthih.
Haba phai sha ka jingiakhun IPL ba mynta, u Shubman ha ka jingiakhun pyrshah ia ka Sunrisers Hyderabad, u la lah ban ialehkai bha haduh ba un da ioh ban thlieh haduh 101 na ki 58 bol kaba lah pynlong ia u ban khur ia kata ka rekod ba seisoh ha ka kam ialehkai ka jong u.
U lah sdang ruh ia u snem ialehkai da kaba bynrap ialade ha ka thup jong ki khyndiat noh ki nongialehkai kiba la lah ban kamai arsien ki spah ron ha ka jingialehkai ODI ha ka jingiakhun pyrshah ia ka New Zealand ha kaba u la lah ban kamai haduh 208 ron na ki 149 bol. Shuh shuh u Shubman u lah kamai ruh ia ka spah ron kaba lai ha ka jingialehkai T20Is pyrshah ia ka New Zealand ha kaba u lah kamai ia ki 126 ron na ki 99 bol ha ryngkat bad ka strike rate kaba 200.
Ha kajuh ka rukom ruh, utei u nongtied ba tbit jong ka kynhun ialehkai IPL ba mynta ka Gujarat u lah kamai ruh ia ka spah ron ha ka jingialehkai Test pyrshah ia ka Australia mynta u snem; ha kaba u lah kamai ia ki 128 ron na kata ka jingiakhun.
Ha ka jingiakhun IPL kaba dang iaid shakhmat mynta, u la lah ban thlieh haduh 576 ron ha ryngkat bad ka average kaba 48.00 bad ka strike rate kaba 146.19. kumta kum u nongtied ba tbit, u Gill u lah khur shalade ia ki saw tylli ki 100 ron tam bad kawei ka 100 ron ha ki 13 tylli ki jingialehkai.
Ka khubor ka iathuh ruh ba u Shubman Gill u lah ioh ruh ia ka jingshah pynkupburom da ka khusnam “Player of the Match” halor ka jinglah ban ialehkai bha ha ka kam ialehkai kum u nongtied bad ka jinglah ruh ban kamai ia ki 101 ron na ki 58 bol kiba u lah khyrwit shabar jong u lain.
