Shillong, Jymmang 16:
U Myntri Rangbah ka Jylla, u Conrad K Sangma ha ka sngi Ba-ar u la pyntip ba ka Sorkar Meghalaya bad ka Sorkar Assam kin sa shong jingïalang ban ïakren pynbeit pud jong ka wat ba ar ha kine ki artaïew ban wan.
“Ka jingïalang bad ka Sorkar Assam khlem pep kan sa long mynta ha shwa ban kut u bnai Jymmang na ka bynta ban pynïaid shakhmat ïa ka bynta ne ka wat kaba ar jong ka jingïakren pynbeit pud,” la ong u Conrad bad bynrap ruh ba na ka liang ka Sorkar Meghalaya ka la ïakren na ka por sha ka por bad ka Sorkar Assam halor ka jingjia kaba la jia ha ka shnong Khanduli.
“Na ka bynta ban wanrah ïa ka jingshong shngaiñ jong ki paidbah kiba shong ba sah ha khappud khamtam ha kito ki shnong kiba jur ka jingïakynduh, na ka liang ka Sorkar Meghalaya bad Sorkar Assam, ngi la ïa rai lang ban don noh da ka jinghiar jurip lang ha kito ki shnong,” la ong u Conrad.
Ha kajuh ka por la buh ruh ka jingkyntu ïa ki bor pynïaid District, ki nongshong shnong bad ki ophisar kiba peit ïa ki thaiñ khappud ba kin kiar na kino kino ki kam kiba lah ban wanrah ïa ka jingïakynad hapdeng ki arliang mamla, la ong u Myntri Rangbah.
Kum ban shu pynkynmaw ba dang shen ka la mih ka jingïakynad hapdeng ki jaitbynriew Karbi bad ki Khasi-Pnar ha ka shnong Khanduli ha West Jaiñtia Hills kaba la poi shaduh u pud jong ka jingïaktah kti bad ïalun maw.
