London, Jymmang:
Wat la ka kynhun ialehkai Badminton ka ri ka lah shah pynwai noh ka jingiakhun na ka bynta ban rung sha ka rynsan iakhun knock-out ha ka Sudirman Cup ba mynta, hynrei ka kynhun ialehkai jong ka ri ka lah pynkut syndon noh ia ka jingiaid lynti ha katei ka lympung ialehkai da kaba khur ia ka jingjop da 4-1 pyrshah ia ka Australia ha ka jingiakhun ba khatduh na ka jing-iakynduh ia aireng bad katei ka ri ha ka Group C.
Da kaba shah buh ha ka ‘Group of Death’, ka khubor ka iathuh ba katei ka kynhun ialehkai ka ri ka lah shah rem noh da 1-4 ha ka Chinese Taipei bad da 0-5 ha ka jingiakhun pyrshah bad ka Malaysia; kiba ki ar jingialehkai ba kham khia ki jong ka ba ka iakynduh na ka bynta ka jingkhyllem noh ka jong ka na ka Mixed Team Championship.
Ha ka jingiakhun pyrshah bad ka Australia, ka India kam shym la iohlad ban ialehkai bha naduh kaba sdang; ha kaba ka kynhun ialehkai ba shijur kata u Sai Pratheek bad ka Tanisha Crasto ki lah shah rem noh da 21-17 14-21 18-21 pyrshah ia u Kenneth Zhe Hooi Choo & Gronya Somerville. Shuh shuh ruh u HS Prannoy u lah nang iai kyntiew dor-thong na bynta ka kynhun da kaba khur shalade ia ki 21-8 21-8 jingjop pyrshah ia u Jack Yu.
Ha ka jaka jong ka Sindhu ka kynhun ialehkai jong ki kynthei ka lah pynmih da ka Anupama Upadhyaya bad katei ka nongialehkai kam shym la pynlehnohei ia ka jingioh ialehkai ka jong ka, hynrei kaba la lah ban khur ia ka jingjop shalade da 21-16 21-18 pyrshah ia ka Tiffany Ho. Kumta ruh, u MR Arjun bad Dhruv Kapila ki lah pynliem noh ia u Ricky Tang bad Ryane Wang da 21-11 21-12 ha ka jingiakhun ki shynrang na ka bynta ban pynioh sha ka kynhun ia ka jingtam jingjop shakhmat da 3-1.
Ha ka jingiakhun ki kynthei, ka Crasto & Ashwini Ponnappa ki lah pyndep ia ka jingiakhun jong ki da ka jingjop, da ka jinglah ban pynliem noh ia ka Kaitlyn Ea & Angela Yu da 21-19 21-13 na ka bynta ban ai sha ka ri ia katei ka jingjop jong ka pyrshah ia ka Australia.
