New Delhi, Jymmang:
Katkum ka khubor ba la ioh lum ka iathuh ba ka jingpyniakab kynhun ialehkai phutbol na ka bynta ka lympung SAFF Cup ka ban long ha u bnai Jylliew naduh ka 21 tarik haduh ka 4 tarik u Naitung 2023, ka iathuh ba ka kynhun ialehkai ka ri (India) bad ka Pakistan kin pynkhreh mynta na ka bynta ka jingpynthymmai ia ka jingiakhun pyrshah ka jong ki hadien kumba san snem, ha kaba kitei ki ar kynhun ki lah shah pynngat lang mynta ha kajuh ka group.
Kumta ha katei ka jingpyniakab na ka bynta katei ka lympung ialehkai jong ka bynta ba 14 jong ka South Asian Football Federation Cup, la pynlong ha ki khyndiat sngi ba la leit noh ha ryngkat bad ka India kaba dang iai bat kum ka lahduh ha ka lympung. Ka Pakistan, Kuwait bad Nepal ki long mynta kiba lah shah pynhap lang ha kajuh ka group kata ha ka Group A. Katba ka Lebanon, Maldives, Bangladesh bad Bhutan pat ki long kiba lah shah pynrung ha ka Group B.
Shuh shuh ruh ki jingialehkai jong kitei ki ar group ki ban iakhun pyrshah kawei ia kawei pat ka kynhun na la ka jong ka group, yn pynialehkai shuwa da ka Round-robin league. Hadien kata ki ar tylli kynhun ialehkai kiba wan shakhmat na man kitei ki group kin shah jied na ka bynta ban ia aireng na bynta ka semifinal jong katei ka lympung ialehkai jong ki phra tylli ki ri ba marjan ia kaba yn pynlong ha Kanteerava Stadium.
Kumta ruh ka Lebanon bad Kuwait kiba long ki ar tylli ki ri kiba shabar jong ka South Asia, ki lah shah khot sngewbha na ka bynta ban pynitynnad shuh shuh ia katei ka lympung ialehkai. Kumta ruh ka Lebanon ka long ka kynhun ialehkai kaba hajrongeh ha ka kyrdan ha katei ka lympung ialehkai ha ka kyrdan ba 99 katba ka Pakistan ka long kaba shapoheh ka kyrdan jong ka da 195; katba ka India ka long kaba ar ha ka kyrdan ba hajrong kata ha ka kyrdan ba 101.
Ka khubor ka iathuh ruh ba ka jingiakhun hapdeng ka India bad Pakistan na ka Group A yn pynialehkai ha ka 21 tarik u Jylliew ha ka jingiakhun kaba ar jong ka sngi sdang ka lympung hadien ba ka Kuwait kan iakhun pyrshah ia ka Nepal ha kaba nyngkongeh jong ki jing-ialehkai ha katei ka lympung.
Ka sien kaba khatduh ba ka India ka la ia aireng pyrshah ia ka Pakistan ka long ha u bnai Nailur, 2018 ha ka jingiakhun semifinal ha ka bynta ba 12 jong katei ka lympung ialehkai ba lah pynlong ha Dhaka. Ha kane ka jing-ialehkai ka India ka lah rah ia ka jingjop da 3-1 kol, hynrei kaba la shah pynrem noh ha ka Maldives da 1-2 kol ha ka jingiakhun phainal.
Kumta baroh-lin, ka India bad Pakistan ki lah dep ban iakhun pyrshah ha palat 20 tylli ki jingialehkai Shabar-ri bad na kita ar tylli, ka India ka long ka kynhun kaba lah ioh ban pyniaid ia ka jingiakhun lah palat bunsien ka jingkhur jingjop.
Ka kynhun ialehkai ka ri ka lah rah ruh ia ka trophy jingjop na ka tei ka lympung ialehkai haduh 8 sien naba ka lah pyndep ruh kum ka kynhun wan ba-ar ha ka lympung haduh saw sien. Ka long ruh shisien ka por ha kaba ka India kam shym la lah ban rung sha ka jingiakhun phainal kata ha ka bynta ba 5 jong katei ka lympung ialehkai ha u snem 2003 ha Dhaka, ha kaba ka kynhun ialehkai jong ka ri ka lah wan ha ka kyrdan balai.
Kumta ruh ha kane ka sien ba mynta, ka All India Football Federation (AIFF) ka don ia ka jingkyrmen ba ki nongialehkai ka Pakistan bad ki nongkitkam jong ka kynhun baroh kawei kin ioh ia ki visa jong ki na ka bynta ban wan shimbynta ha katei ka lympung ialehkai jong une u snem ba mynta.
Kumba ka paw hi ka long ba ka Pakistan kam shym la mih madan ha ki ar lympung ialehkai na ka bynta ba 13 ia kaba lah dep ban pynlong pat ia ka lympung haduh mynta naduh u snem 1993.
Shuh shuh ruh ka Pakistan Football Federation(PFF) kam shym la lah ban phah ia ka kynhun ialehkai jong ka ha u snem 2015 jong ka lympung ialehkai kaba lah long ha India na ka daw jong ka jingiakynad hapdeng ki ar ri. Katei ka ri ka lah duh ruh ban shimbynta ha ka bynta jong ka lympung kaba lah long ha u snem 2021 ha Maldives; naba ka Pakistan ka dang don hapoh ka jingshah sospon ha ka FIFA bad ia katei ka jingpynshitom lah weng noh dang ha u bnai Jylliew jong u snem 2022.
Ka prokram ialehkai naduh kaba sdang jong katei ka lympung ialehkai mynta u snem ka long:
21 Jylliew : Kuwait vs Nepal, 3.30 pm IST; India vs Pakistan, 7.30 pm IST.
22 Jylliew: Lebanon vs Bangladesh, 3.30 pm IST; Maldives vs Bhutan, 7.30 pm IST.
24 Jylliew: Pakistan vs Kuwait, 3.30 pm IST; Nepal vs India, 7.30 pm IST.
25 Jylliew: Bangladesh vs Maldives, 3.30 pm IST; Bhutan vs Lebanon, 7.30 pm IST.
27 Jylliew: Nepal vs Pakistan, 3.30 pm IST; India vs Kuwait, 7.30 pm IST.
28 Jylliew: Lebanon vs Maldives, 3.30 pm IST; Bhutan vs Bangladesh, 7.30 pm IST.
1 Naitung: Semi finals
4 Naitung: Final.
