Shillong, Jymmang 17:
Ka jingïakren kaba pura bad ka Hynñiewtrep National Liberation Council (HNLC) kan sa sdang pura ha ka taïew banyngkong jong u Jylliew.
Ïa kane la ïathuh da u Myntri Rangbah u Conrad K Sangma haba ïakren bad ki nongthoh khubor ha ka Sngi Balang.
U la ong ba ha ka Sngi Ba-ar, ka la don ka jingïakynduh jong u Symbud Myntri Rangbah, Bah Prestone Tynsong uba peit ïa ka tnat pulit bad ki nongïalam ka HNLC. Ha kane ka jingïakynduh la pynbeit ba ka jingïakren kaba pura kan sdang noh ha ka taïew banyngkong jong u Jylliew.
Haba kylli kiei ki mat kiba hakhmat eh jong ka jingïakren bad ka HNLC, u Conrad u la ong, ai ba ka jingïakren kan sdang bad ki ksiang na baroh arliang mamla, kata, na ka liang ka HNLC bad ka Sorkar ha kaba kin sa wanrah ïa ki mat kiba dei ban buh hakhmat ban pynïaid ïa ka jingïakren ïasuk.
Halor ka jingpyrshang khie rasong biang ka kynhun kieng atiar, kata, ka Garo National Liberation Army (GNLA), u Conrad u la ong ba ka Sorkar ka ju ïohpdiang bun ki jingtip na ki tyllong bapher bapher, bad ka Sorkar ka ju leh eiei halor kita ki jingtip da kaba pyntikna la kita ki jingtip ki dei kiba shisha ne ki bym shisha.
“Ka Sorkar ka ju ïohpdiang bun ki jingtip man la ka sngi bad ka ju shimkhia ïa kita ki jingtip kiba donkam. Hynrei ban shu pynkut noh ba ka kynhun ka la khie rasong kam long kaba dei namar ba donkam ban pyntikna la kita ki jingtip la ki long kiba dei ne ki bym dei,” u la ong.
Dang shen ka don ka jinglait tuh jong ka jingtip hapoh ka tnat pulit kaba batai ba ka GNLA ka la pyrshang ban khie rasong ha kaba la phah hikai pyntbit ruh ïa kumba 500 ngut ki dkhot jong ka.
