Rome, Jymmang:
Ha ka jingiakhun Tennis jong ka lympung ialehkai ba mynta ka Italian Open, u Novak Djokovic da kaba suk u la lah ban jam pat sa sha ka jingiakhun quarter-final, hadien ka jinglah ban pynliem da kaba suk ia u rangiakhun pyrshah na Bilat u Cameron Norrie da 6-3, 6-4.
Shuh shuh ka khubor ka iathuh ruh ba kiwei pat ki rangiakhun ha ka lympung kata u nongkhur jingjop ha ka Monte Carlo Masters u Andrey Rublev bad u nongialehkai na katei ka ri ba pynlong mynta ia ka lympung u Jannik Sinner, ki lah khyllem noh na ka lympung ialehkai ka jong ki. Ka khubor ka iathuh ruh ba u Djokovic u lah kynjoh sha katei ka rynsan iakhun ha man la ki 16 sien ioh ialehkai ki jong u ba lah dep ha ka lympung bad mynta sa shisien u lah pynurlong biang ia katei kajuh ka bynta da ka jinglah ban pynrem noh ia u tei u rangialehkai ba tbit na Bilat khnang ban ioh iakhun pat sa bad u Holger Rune ha ka jingiakhun kaba long ruh kum jingkilan-met ka jong ki na ka bynta ka French Open.
Ka jingiakhun biang bad u Rune kan long ruh ka jingia aireng biang sa shisien hapdeng u Novak bad utei u rangialehkai na Denmark, ha kaba ki lah dep ban iakhun phainal ha u snem ba lah dep ha ka Paris Masters kaba lah pynlong ia u Rune ban rah ia ka thong jingjop ba nyngkong jong ka Masters 1000 da kaba pynliem noh ia u Novak ha ka jingiakhun kaba lah pynitynnad ia ki nongpeitkai. Kumba ka paw mynta, u Djokovic u dang iai behthong na ka bynta ban khur ia ka trophy jingjop ba hynniew na katei ka lympung ialehkai ba mynta ha Rome bad kata ka lad ka lah kham pynsuk ia u hadien ka jingshah pynkut noh ka jingiaid lynti u Carlos Alcaraz na ka lympung ialehkai baroh kawei.
Ha kawei pat ka jingialehkai, u Daniil Medvedev u la lah ha ka ban khur shalade ia ki 6-2, 7-6 (7/3) pyrshah ia u Alexander Zverev, u Casper Ruud ia u Laslo Djere bad u Borna Coric pat ha ki lai set iakhun da kaba jop pyrshah ia u Fabian Marozsan. Shuh shuh ruh u Stefanos Tsitsipas ia u Lorenzo Sonego da 6-3, 7-6 (7/3). U Rublev u lah shah pynliem noh da 7-6 (7/5), 4-6, 6-3 ha u nongialehkai na Germany u Yannick Hanfmann.
Ha ka jingiakhun ki kynthei, ka Iga Swiatek ka lah nang iai sar jingjop sha ki 14 tylli ki jingialehkai jingjop ki jong ka da kaba khur shalade ia ki 6-3, 6-4 pyrshah ia ka Donna Vekic. Hadien katei, ka Iga Swiatek kan iakynduh sa bad ka Elena Rybakina ha ka quarter-final.
