Ka Art of Giving (AOG) ka dei kawei na ki saiñ pyrkhat kaba phai khmat na ka bynta ki lad ban kyntiew ïa ka jingkmen bad jingsuk ha ka pyrthei. Ka sdang na ka seng pyrkhat jong man la u briew u ba wad ïa ka jingkmen bad ka jingsuk; hynrei lyngba ka jingtyllun jong ka por bad ka jingïabeh ïa ki jingdon jingem jong ka pyrthei, ki don ki por ba u bynriew u duh noh ïa ka na ki daw jong ka jingphai khmat sha ki kam ki kam kiba dei tang na ka bynta ka myntoi lade. Ka AOG ka dei kawei na ki lad ki lynti kaba lah ban sop ban spaiñ ïa ki jingmong jong ka pyrthei – kaba lah ban pynsphriang ïa ka kyrwoh jong ka jingkyrmen na ka bynta ban pynïatylli ïa u paid bynriew ba un im suk im saiñ ha ka imlang sahlang.
Ka kam ai sngewbha ka dei kawei na ki jait kam ka ba kyrsoi na ka saiñ pyrkhat bad na ka jingthrang jong u briew ban ai ïa ki lad jingïarap sha kiwei pat ki briew khlem da khmih lynti ïa ka jingsiew kylliang. Ka dei kawei na ki lad ki lynti kiba bha eh kaba lah ban wanrah ïa ka suk ka saiñ ha ka imlang sahlang bad ka jingïatylli ha man la uwei pa uwei u dkhot jong ka imlang ka sahlang.
Ka AOG ka la lah ban pynkup bor ïa kumba 2 million ngut ki nongshong shnong lyngba ka jinglah ban pynbiang ïa ki lad jingpule bad kiwei kiwei ki lad jingïarap kiba kyntiew ïa ka long rynnieng man rynnieng jong u briew. Na ka liang u nongseng jong ka AOG, u Achyuta Samanta u la pyntip ba u la pynsdang ïa ki kam ai sngewbha naduh ba u dang dap 5 snem ka rta, ha ka por ba um pat shym la don satia ïa kino kino ki lad kamai kajih. U la ïathuh ba na ka jinglah jong u ban don bynta ha ki kam ai sngewbha bad ai jingïarap u la lah ban seng ïa ka “Art of Giving” ha ka 17 tarik u Jymmang, 2013 bad naduh utei u snem ka AOG ka la kylla long kum kawei na ki seng treimon sngewbha kaba trei na ka bynta ka bha ka miat jong uwei pa uwei u dkhot ka imlang sahlang – da kaba pynsngewthuh paidbah halor ka jingdonkam ban sumar bad khmih mar kylliang hapdeng ki dkhot jong ka imlang sahlang na ka bynta ban pynsaphriang ïa ka jingkmenm ka suk ka saiñ ha ka pyrthei. Ka thong kaba hakhmat eh jong ka AOG kam shym la dei satia tang lyngba ki lad ai jingïarap da ka pisa ne da kino kino ki tiar ki tar kiba donkam ha ka jingim briew; hynrei kaba kham kongsan ka dei ka jingai mynsiem, ka jingpynshlur bad ka jingïarap markylliang ban pynsgewthuh halor bun tylli ki mat kiba ïadei bad ki jingïakhun ha ka jingim kaba man ka sngi – khamtam ha ka saiñ pyrkhat.
Ka AOG ha ki khyndiat snem kiba la dep ka la lah ban kiew kyrdan sha kawei na ki seng trei mon sngewbha ka ba trei na ka bynta ban kyntiew ïa ka jingsuk jingkmen, ka jingsngur mynsiem bad ka jingïarap mar kylliang ha ka imlang sahlang. Ha ka pyrthei kaba dap bun da ka pang ka shitom bad ki jingeh kiba bun jait – ka AOG ka pynbiang ïa ka rynsan ban wanrah ïa ka jingïadei hapdeng kito kiba donkam ïa ki lad jingïarap bad kito kiba don ïa ka jingsliang ban pynbiang ïa ki lad jingïarap. Ka AOG ka ai mynsiem ïa kito ki briew kiba don shisha ïa ka mynsiem sngewlem na ka bynta ki para marjan marpa jong ki ha ka imlang ka sahlang. Bun na ki briew kiba don bynta ha ki kam ai jingïarap ki ïoh ruh ïa ka kmen ka sngewbha ha ka jingim ka jong ki ban ïohi ba kito kiba ki ïarap ki dap da ka jingsngewnguh kaba khraw. Lyngba ki sienjam jong ka AOG, la ïathuh ba ki la don bun ki briew kiba la sdang ban phaikhmat ban pynsaphriang ïa ka kyrwoh jong ka jingsuk, jingkmen bad jingieit ha ka pyrthei.
Ha ki 9 snem kiba la leit noh, na ka liang ki dkhot jong ka AOG – ha ryngkat ki nongkit bok kit rwiang ki la rakhe ïa ka 17 tarik u Jymmang kum ka “International Day of Art of Giving” bad la rakhe ïa kaeti ka sngi halor ki mat kiba ïadei bad ka imlang ka sahlang, ka jingngeit ha ki kynja mynsiem, ka jingngeit kaba ïadei bad ka jinglong tylli ki paidbynriew bad ban pynïatylli ïa baroh 3 tylli kitei ki mat.
Hadien u 2017, la ïathuh ba ka jingdon jong ki dkhot ka AOG ki la kiew na ki hajar ngut sha ki million ngut kiba shim ruh ïa ki lad ki lynti kiba janai tam na ka bynta ban kyntiew ïa ka imlang ka sahlang. Ïa ka AOG la thaw halor 3 tylli ki mat trei kam, kata, da ki riew paidbah, jong ki paidbah bad na ka bynta ki riew paidbah (by the public, of the public and for the public). Ha u snem 2018, ka rynsan ‘Pyaar Bhara Pack’ ka la long kaba jop ha kaba la lah ban sam ïa haduh palat 20 million ki song sam sha kito kiba donkam ïa ki lad jingïarap. Ha u 2019, ka rynsan ‘Bag of Happiness’ ka la lah ban pynïatylli ïa ki briew da kaba sam sngewbha ïa ki song jingïarap na ka bynta ki khynnah pule. Ha u snem 2020 u ba dei u snem jong ka jingsaphriang ka jingpang COVID-19, ka AOG ka la lah ruh ban thaw da ka kynhun kaba la tip kyrteng kum ka “AOG Fights Corona” kaba la lah ban shim ïa ki sienjam ban pynbiang ïa ki lad jingïarap na ka bynta ki longïing kiba shah ktah ha katei ka jingpang. Ha u snem 2021, ka AOG ka la pynsdang da ka rynsan kaba la ai kyrteng ka “My Mother My Hero” ha kaba ki dkhot bad ki nongkyrshan jong ka AOG ki la lah ban phah ïa ki kyrwoh jingai khublei kyrpang na ka bynta ki longkmie kiba dei ki nongsumar ïa ka ïing ka sem. Shuh shuh ha u snem 2022, ka AOG ka la lah ruh ban pynsdang da ka rynsan “Hope, Happiness and Harmony” na ka bynta ban wanrah ïa ka jingïatylli hapdeng ki paid bynriew – ban ai jingkyrshan bad ïa ieit iwei ïa iwei. Ha une u snem ba mynta, ka AOG kan pynsdang da ka rynsan kaba la tip kyrteng kum ka “Helping the Help”.
Ha ryngkat 20 million ngut ki nongkyrshan bad 1.5 million ngut ki dkhot, ka AOG ka la nang roi nang roi katba dang ïai mih ki sngi. Ka la lah ban pynïar ïa ki shnat trei kam jong ka ha palat 300 tylli ki jaka kiba don ha 120 tylli ki ri jong ka pyrthei, ha baroh ki jylla jong ka ri India bad ha baroh ki panchayat bad ki block jong ka Odisha. Lyngba ki rynsan jong ka ‘social media’, ka AOG ka la lah ban pynkylla ïa bad kyntiew ki jingim jong palat 10 million ngut.
Man la ka sngi, ka AOG ka shim ïa ki sienjam kiba janai eh na ka bynta ban wanrah ïa ka jingbha ha ka pyrthei. Ka AOG ka trei kam ha bun tylli ki lad kiba ïadei bad ka jingwanrah ïa ka suk ka saiñ bad ka roi ka par ha ka imlang sahlang – kynthup ïa ka jingpynbiang ïa ki lad jingïarap ha ki jingjia shah lynshop mariang, ka jingpyntrei ïa ki kam pynroi ha ki thaiñ kyndong, ka jingpynkup bor ïa ki riew kynthei, ka jingïada ïa ka mariang, ka jingpynlong ïa ki rynsan sumar bad kiwei kiwei ki lad jingïarap.
Ka Art of Giving kam dei ka lad treikam kaba dang thymmai; ka la don ha ka pyrthei da ki spah spah snem. Lah ban shem ïa ka ha ki jingai jinghikai ba bha jong ki jait niam bapher bapher naduh ki por u mynbarim.
Ka jingrakhe ïa ka ‘International Day of Art of Giving’ ka dei shi bynta kum kawei na ki jingpynkynmaw ïa uwei pa uwei u briew ba u lah ban wanrah ïa ka jingkylla ha ka jingim jong uwei pat u briew lyngba ki lad ai jingïarap, ka jingieit bad ka jingsngewlem.
