Shillong, Jymmang 17:
Ka Kynhun Myntri jong ka Sorkar Jylla ka la ïatai ïa ka Roster System ha ka jingïalang kaba la long ha ka Sngi Balang ha kaba batai bniah ïa ka rukom kheiñ ïa ka bhah hapoh jong ka Reservation Policy bad ïa kane ka jingbatai yn dang pyni sa ha ka jingïalang jong ka kynhun Meghalaya Democratic Alliance (MDA) bad jong ki seng saiñ pyrthei ka ban sa long shen ha kine ki sngi.
Haba kren sha ki lad pathai khubor hadien ba la wai ka jingïalang ka Kynhun Myntri, u Myntri Rangbah u Conrad ka Sangma u la ong ba ka Kynhun Myntri ka ïakren halor ka Roster katkum ka jingbthah ka Ïingbishar ha kaba la ïoh ka jingbatai kaba la ai shibun ki jingsngewthuh.
U Conrad u la ong ba ka Roster bad ka jingthungkam (recruitment) ka dei ka kam kaba hap ban bteng bad kaba hap ïaid shakhmat.
Haba kylli halor ka jingktah ïa kiba wad kam kiba la kut ka rta bad kiba la jan kut ka rta, khamtam ba don ka jingdawa ban pynsangeh ïa ka jingthung kam na ka VPP, u Myntri Rangbah u la ong ba ka Sorkar ka bud ïa ka jingbthah jong ka Ïingbishar bad u kubur ba ka don beit ka jingktah ïa kiba la jan kut ka rta lada pynsangeh ïa ka jingthung kam.
“Ka Roster ka dei ka hukum jong ka Ïingbishar kaba ngi hap ban bud bad pyntreikam,” u la ong.
Nangta, u la ong ba haba pynsangeh ïa ka jingthung kam, kan nang slem shuh shuh ka por ban pyndep ïa ki jingthung kam.
Kumta u Myntri Rangbah u la ong ba ka Sorkar Jylla ka kwah ban ïatai ïa kane ka kam sa ha ka jingïalang jong ka MDA bad ruh ha ka jingïalang bad ki seng saiñ pyrthei.
Hadien kine ki jingïalang, u la ong ba kan don ruh ka jingïalang bad kiwei pat ki kynhun sengbhalang.
Haba kylli halor ka jingpyntrei ïa ka Roster nangne shakhmat ne ïaid shadien, u Myntri Rangbah u la ong ba ym don kata kaba ong shadien ne shakhmat, hynrei ka jingthung kam ka dei ka kam kaba bteng bad ïaid shakhmat.
Halor ka jingdawa ban pynkylla ïa ka bhah thung kam (reservation policy), u Myntri Rangbah u la ong ba ïa mynta, ka jingïatai ka dei halor ka Roster.
