Shillong, Jymmang 17:
Ka Meghalaya High Court ha ka Sngi Balang ka la ong ba da ka jinglap ïa ka jingtih dewïong be-aiñ, ka jingmih ki karkhana thang dewïong khlem da ïoh laisen ne jingbit, bad ka jingbteng ka jingkit dewïong be-aiñ ha baroh kawei ka jylla, ka bynta jong ka sorkar jylla ban ym kohnguh ïa ki hukum ka NGT bad Supreme Court, bad ka jingïadei bad jingïatreilang hapdeng ka sorkar jylla bad ki ‘Mafia’ kiba don bynta ha ka jingtih bad jingkit dewïong be-aiñ, ka la nang paw.
Ïa kane, ka High Court ka la pynpaw ha ka por ba ka shong bishar ïa ka mukotduma kaba la ai da u Champer M Sangma pyrshah ïa ka sorkar jylla bad kiwei halor ka jingkit dewïong be-aiñ.
Ha kane ka sngi, na ka liang ka tnat Customs jong ka Sorkar Pdeng ka la wanrah ïa kiba bun ki kot ki sla bad ki shithi kiba ïadei bad ki kam khaïi dewïong. Kawei na ki kot ki sla ka dei ka ‘e-way bill’ kaba 16 tarik Nohprah, 2021 ba la pyni da ka Jaimaa Coal Private Limited ha Gasuapara Land Customs Station, South Garo Hills, ban khaïi ïa u dewïong uba don 12 Metric Ton sha Bangladesh.
Ka tnat Customs ka la pynpaw ba ki donkam ban peit tang ïa ka ‘e-way bill’ bad ha kita ki ‘e-way bill’ la ju don ka jingsoi na ka sorkar Meghalaya bad ka Directorate of Mineral Resources. Ïa kine hap ban pyni ha ki ar jaka, kata, ha Dainadubi ha ka por ba ka trok ka la wan rung sha Meghalaya bad kawei ha Gasuapara hashwa ban poi ha ka Land Customs Station.
Ban shu batai lyngkot, ki bor ba dei khmih ha ki Land Customs Station, lada ki ïoh jingujor na kiba bun, ki ai jingtip sha ka sorkar Meghalaya bad kan dei ka jingkitkhlieh jong ka sorkar jylla ban peit bniah hashwa ban ai ïa ki Permit ne jingbit ban khaïi dewïong shabar Ri.
Napdeng ki shithi, ka la don kawei kaba la thoh ha ka 11 tarik Naiwieng, 2019 da ka Myntri ka tnat Pla Tyngka ka Sorkar Pdeng sha u Myntri Rangbah ka jylla Meghalaya ha kaba ka la ong ba ka sorkar jylla ka dei ban peit bniah bha ïa ki “Transport Challan” namar ki briew ka tnat Customs kim don ka iktiar ban pyntikna naei u dewïong u wan poi ha ki Land Customs Station.
Na ka liang ka High Court ka la ong ba watla ki don ki mukotduma halor ka jingtih bad jingkit dewïong be-aiñ bad watla ki la don ki hukum na ka NGT bad Supreme Court, bad watla ka High Court ka la ai hukum ba dei ban pynsangeh ïa ka jingtih bad jingkit dewïong be-aiñ, ka sorkar jylla ka khlem leh eiei ban pyntip sha ka ïingbishar halor kitei ki shithi khamtam ka shithi ba la thoh da ka Myntri Sorkar Pdeng sha u Myntri Rangbah ka jylla.
Ka High Court ka la bthah ïa ka sorkar jylla bad ïa ka Jaimaa Coal Private Limited ba kin ai jubab halor ki kot ki sla bad ki shithi ba la ïohpdiang, bad ka jingbishar kan long biang ha ka 1 tarik Jylliew, 2023.
